ཇི་ལྟར་བོད་ཀྱི་གསོ་བ་རིག་པའི་ལྷན་ཚོགས་ནས་སྔ་རྗེས་ལན་གྲངས་དུ་མ་གསོལ་འདེབས་ཞུས་པ་ལས། ཁྱབ་བདག་འཁོར་ལོའི་མགོན་པོ་ ༸ བྱམས་མགོན་རྡོ་རྗེ་འཆང་མཆོག་གི་ཞལ་སྔ་ནས་འཕགས་ཡུལ་གདན་ས་དཔལ་སྤུངས་ཤེས་རབ་རྣམ་པར་གླིང་དུ་བོད་ཀྱི་གསོ་བ་རིག་པའི་ལྷན་ཚོགས་ཀྱི་དབུ་ལས་སྨན་པ་རྣམས་དང་། གདན་སའི་རིག་གནས་མཐོ་སློབ་ཀྱི་དགེ་ལས་སློབ་ཕྲུག་བཅས་ལ་བདེ་གཤེགས་སྨན་བླ་མི་གཟུགས་སུ་བྱོན་པ་འཚོ་མཛད་གྲུབ་པའི་དབང་ཕྱུག་གཡུ་ཐོག་ཡོན་ཏན་མགོན་པོའི་དགོངས་པའི་ཀློང་ནས་རང་བྱུང་དུ་བརྡོལ་ཅིང་བརྒྱུད་འཛིན་གཙོ་བོ་སུམ་སྟོན་ཡེ་ཤེས་གཟུངས་ལ་ཆིག་བརྒྱུད་དུ་བསྩལ་པའི་བླ་སྒྲུབ་སྡུག་བསྔལ་མུན་སེལ་གྱི་དབང་ལུང་ཁྲིད་གསུམ་བུམ་པ་གང་བྱོའི་ཚུལ་གྱིས་སྐུ་དྲིན་སྩལ་གནང་མཛད་པ་སྟེ། ཕྱི་ལོ་ ༢༠༢༢ ཟླ་ ༤ ཚེས་ ༨ དང་ ༩ ཉིན་གཉིས་རིང་གདམས་ཟབ་བཀའ་ཡི་གཉེར་གཏད་དང་བཅས་རྩ་བའི་དབང་བསྐུར་རྒྱས་པ་དང་། དོན་དབང་མདོར་བསྡུས། བཀྲ་ཤིས་ཚེ་དབང་། ཕུར་པའི་གཏོར་དབང་། སྨན་བླའི་དབང་ཆོག་སོགས་རིག་གཏད་དང་རྗེས་གནང་ཆ་ལག་དང་བཅས་པ་བསྩལ་གནང་མཛད་པ་དང་། ཕྱི་ཚེས་ ༡༠ དང་ ༡༡ ཉིན་གཉིས་རིང་ཕྱི་ནང་གསང་བའི་སྒྲུབ་ཐབས་སོ་སོའི་སྔོན་འགྲོ་གསག་སྦྱོང་གི་རིམ་པ། དངོས་གཞི་སྒོམ་བཟླས་ཀྱི་ཡན་ལག རྗེས་འཕྲིན་ལས་ཀྱི་སྦྱོར་བ་སོགས་བསྐྱེད་རྫོགས་ལམ་གྱི་རིམ་པ་དག་ལ་ཇི་ལྟར་སློབ་ཚུལ་གྱི་ལག་ལེན་དམར་ཁྲིད་མཛད་པའི་ཁར་བླ་སྒྲུབ་ཀྱི་སྒྲུབ་ཁོག་དང་འདོན་ཆ་ཡོངས་རྫོགས་ཀྱི་ལྗགས་ལུང་བསྩལ་གནང་མཛད་ཅིང་རྗེ་བླ་མ་མཆོག་ནས་བོད་ཀྱི་སྐད་ཡིག་གཙོས་པའི་བཅུ་ཕྲག་རིག་གནས་སྤྱི་དང་། ལྷག་ཏུ་བོད་ཀྱི་གསོ་བ་རིག་པའི་བསྟན་པ་རྒྱུན་འཛིན་དར་སྤེལ་ཆེད་སྒོ་ཀུན་ནས་འབད་འབུངས་དགོས་ཤིང་། དེ་ཡང་སློབ་བཤད་དང་སྨན་དཔྱད་ལག་ལེན་ཙམ་གྱིས་མི་ཆོག་པར་གསོ་རིག་ཆོས་སྐོར་གྱི་དབང་ལུང་མན་ངག་དང་སྒོམ་སྒྲུབ་ཉམས་ལེན་གྱི་རྒྱབ་རྟེན་ཤིན་ཏུ་གལ་ཆེ་ཚུལ་སོགས་གནད་ལ་སྨིན་པའི་ལམ་སྟོན་བཀའ་སློབ་རྒྱ་ཆེར་སྐུ་དྲིན་བསྩལ་གནང་མཛད། དེ་ལྟར་གཡུ་ཐོག་སྙིང་ཐིག་བླ་སྒྲུབ་ཀྱི་དབང་ལུང་ཁྲིད་རྒྱུན་ཐོབ་རྗེས་ཉིན་གཉིས་ཀྱི་རིང་གེགས་སེལ་རིམ་གྲོ་གནད་སྨིན་ཟབ་སྒྲུབ་ཞུས་ཏེ། ཕྱི་ལོ་ ༢༠༢༢ ཟླ་ ༤ ཚེས་ ༡༥ ཉིན་བོད་ཀྱི་གསོ་བ་རིག་པའི་ལྷན་ཚོགས་འོག་དེབ་སྐྱེལ་ཡོད་པའི་སྨན་པ་འདུན་པ་ཅན་ངོ་གྲངས་༡༡ དང་དེ་བཞིན་བསྒྲུབ་དཔོན་དང་དབུ་མཛད། མཆོད་དཔོན་དང་མཆོད་གཡོག་བཅས་གདན་ས་དཔལ་སྤུངས་ཤངས་པ་སྒྲུབ་ཁང་དུ་སྨན་རྒྱལ་རྗེ་བཙུན་གཡུ་ཐོག་པ་ཆེན་པོའི་སྙིང་ཐིག་ཕྱི་ནང་གསང་གསུམ་ཀྱི་བླ་སྒྲུབ་ཞག་བརྒྱའི་བསྙེན་མཚམས་བཅད་རྒྱ་ཡོངས་སུ་བསྡམས་ནས་ཉམས་ལེན་དངོས་གཞི་སྒོ་འཛུགས་གནང་། གཡུ་ཐོག་སྙིང་ཐིག་བླ་སྒྲུབ་ཀྱི་ལས་རིམ་འདི་བཞིན་བོད་ཀྱི་གསོ་བ་རིག་པའི་ལྷན་ཚོགས་ནས་རེ་འདུན་ཞུས་དོན་གདན་ས་དཔལ་སྤུངས་ཤེས་རབ་གླིང་གི་སྨན་རྩིས་རིག་གནས་མཐོ་སློབ་ནས་གཙོ་འགན་བཞེས་ཐོག་གདན་ས་དབུས་ནས་མཐུན་འགྱུར་ཆ་ཚང་སྦྱར་བ་ལས་གོ་སྒྲིག་ཞུས་ཅིང་། ལས་རིམ་འདི་བཞིན་ཕྱི་ལོ་༢༠༢༢ ཟླ་༤…
ལྷན་ཚོགས་ཀྱི་ཟླ་རེའི་ཚོགས་འདུ།
བོད་ཀྱི་གསོ་བ་རིག་པའི་ལྷན་ཚོགས་ཀྱི་སྒྲིག་གཞི་དགོངས་དོན་ཕྱི་ལོ་༢༠༢༡ ཟླ་༡༡ ཚེས་༡༨ ཉིན་རྒྱབ་ལྷན་ཚོགས་ཀྱི་ཡིག་ཚང་དུ་འཛིན་སྐྱོང་ཚོགས་མི་རྣམས་ཟླ་རེའི་ཚོགས་འདུ་བསྐོང་ཚོགས་ཞུས་པའི་ཚོགས་འདུའི་གྲོས་གཞི་གཙོ་བོ་ཕྱི་ལོ་༢༠༢༢་་༢༣ ལོའི་ལས་འཆར་དང་སྔོན་རྩིས། ལྷན་ཚོགས་དབུ་བརྙེས་ནས་ལོ་༡༨ འཁོར་བའི་དུས་ཚིགས་སྲུང་བརྩི། གསོ་རིག་སློབ་གཉེར་ཁང་དང་སྨན་སྦྱོར་ཁང་དུ་རྟོགས་ཞིབ། རྒྱ་གར་དབུས་སའི་གཞུང་དང་འབྲེལ་བའི་ལས་དོན། རྩིས་ཞིབ་སྙན་ཐོར་ལན་འདེབས། སྨན་པ་དང་སྨན་རྫུས་བཀག་སྡོམ་དང་འབྲེལ་བའི་གྲོས་གཞིའི་ཐོག་གྲོས་བསྡུར་ཐག་གཅོད་བྱུང་ཡོད། ལྷན་ཚོགས་ཀྱི་ཚོགས་མི་ས་གནས་སུ་ཡོད་པ་རྣམས་ངོ་ཐོག་ཚོགས་བཅར་དང་གཞན་རྣམས་དྲ་ཐོག་ནས་ཚོགས་བཅར་མཉམ་ཞུགས་གནང་ཡོད་པ་བཅས།།
གསོ་རིག་སློབ་གཉེར་ཁང་དུ་རྟོགས་ཞིབ་གནང་བ།
བོད་ཀྱི་གསོ་བ་རིག་པའི་ལྷན་ཚོགས་ཀྱི་ཁྲིམས་སྒྲིག་དགོངས་དོན་ཕྱི་ལོ་༢༠༢༡ ཟླ་༣ ཚེས་༢༠ ཉིན་ལྷན་ཚོགས་འོག་དེབ་སྐྱེལ་ཡོད་པའི་གསོ་རིག་འབུམ་བཞིའི་མཐོ་སློབ་སྨན་རིའི་གླིང་ནས་དེབ་སྐྱེལ་འཕར་འགྱངས་ཀྱི་ཞུ་སྙན་འབྱོར་དོན། འདི་ནས་རྟོགས་ཞིབ་ཚོགས་མི་བཞི་ལས་གྲུབ་པའི་ཚོགས་ཆུང་ཟུར་འཛུགས་ཀྱིས་ཕྱི་ལོ་༢༠༢༡ ཟླ་༨ ཚེས་༢༣ ཉིན་སློབ་ཁང་དུ་དངོས་སུ་རྟོགས་ཞིབ་ཆེད་ཕེབས་གནང་། རྟོགས་ཞིབ་ཀྱི་རྒྱུད་རིམ་ནང་ཐོག་མར་ལྷན་ཚོགས་ཀྱི་ཚོགས་གཙོས་རྟོགས་ཞིབ་ཚོགས་མི་རྣམས་ལ་འཚམས་འདྲི་དང་སྦྲགས་དེ་གའི་སློབ་ཁང་གི་རྒྱབ་ལྗོངས་ངོ་སྤྲོད་དང་འབྲེལ་རྟོགས་ཞིབ་ཀྱི་དགོས་དམིགས་དང་ཡིག་ཆ་ཁག་བཅས་ངོ་སྤྲོད་གནང་། སློབ་ཁང་གི་འགན་འཛིན་ནས་སློབ་ཁང་གི་ཉིན་རེའི་བྱེད་སྒོ་དང་སློབ་དགེ་དང་སློབ་ཚན་བཅས་ངོ་སྤྲོད་གནང་། དེ་རྗེས་ཚོགས་ཆུང་གི་ཚོགས་མི་རྣམས་སློབ་ཁང་གི་འཛིན་ཁང་དང་། སློབ་འཁྲིད་གནང་སྟངས། སློབ་མའི་སྡོད་ཤག་དང་རང་སྦྱོང་ཁང་། བརྟག་དཔྱད་སྨན་ཁང་དང་སྨན་ སྤྲོད་ཁང་། སྨན་རྫས་དང་སྨན་སྦྱོར་ཁང་། ནད་གསོ་ཁང་དང་དཔེ་མཛོད་ཁང་བཅས་ནང་རྟོགས་ཞིབ་ལེགས་པར་གནང་། ཚོགས་ཆུང་གི་ ཚོགས་མིས་སྨན་སློབ་གཉིས་ཟུར་དུ་འབོད་ནས་སློབ་འཁྲིད་སློབ་ཚན། སློབ་ཡོན་བསྡུ་བཞེས་དང་། དཔེ་དེབ་སོགས་ཀྱི་ཆ་རྐྱེན། གཞན་ཡང་དེང་དུས་ཚན་རིག་སོགས་ཡན་ལག་སློབ་ཚན་ཆེད་མཁས་དབང་གདན་ཞུ་དང་དེའི་ཕན་ཐོགས་སྐོར་སོགས་གནས་ཚུལ་ཆ་ཚང་བརྒྱུད་ལོན་ཞུས། དེ་རྗེས་སློབ་ཁང་གི་སློབ་སྤྱི་དང་འགན་འཛིན་བཅས་ལས་འཛིན་སྐྱོང་དང་འབྲེལ་བའི་ཡིག་ཆ་ཁག་ཅིག་དང་། དེ་བཞིན་སློབ་མའི་མཚན་གཞུང་དང་། སློབ་འཁྲིད་རྩ་འཛིན་དང་བསྐྱར་ཞིབ། དཔེ་དེབ་ཐོ་གཞུང་། སློབ་ཐོན་ཕྱག་འཁྱེར་ངོ་བཤུས་བཅས་བོད་ཀྱི་གསོ་བ་རིག་པའི་ལྷན་ཚོགས་ནས་གཏན་འབེབས་གནང་བའི་བོད་ཀྱི་གསོ་བ་རིག་པའི་སྨན་པ་དཀའ་བཅུ་པའི་སློབ་གཉེར་ཁང་གི་དེབ་སྐྱེལ་བྱེད་ཕྱོགས་ཀྱི་རྩ་འཛིན་སྒྲིག་གཞི་དགོངས་དོན་ཆ་རྐྱེན་དང་ཡིག་ཆ་བཅས་མཁོ་སྒྲུབ་ཞུས་རྗེས་སློབ་ཁང་ནས་འགེངས་ཤོག (Form 1/A) ཚོགས་ཆུང་གི་ཚོགས་མི་རྣམས་ནས་རྟོགས་ཞིབ་སྙན་ཐོའི་འགེངས་ཤོག་ (Form 1/ B, C) དང་མཉམ་སྦྱར་ཡིག་ཆ་ཁག་བཅས་ལེགས་ པར་བསྐངས་མཐར་ཚོགས་ཆུང་ནས་གོང་གསལ་སློབ་ཁང་དེར་སྒྲིག་མཐུན་ཆ་རྐྱེན་ཕལ་ཆེར་ཚང་བར་རྟེན་གཏན་འཇགས་དེབ་སྐྱེལ་གྱི་རྒྱབ་གཉེར་གནང་བའི་སྙན་ཐོ་དང་ཡིག་ཆ་བཅས་ལྷན་ཚོགས་སུ་ཕུལ། ཕྱི་ལོ་༢༠༢༡ ཟླ་༨ ༢༦་་་༢༨ བར་གྱི་ལྷན་ཚོགས་ཚོགས་ཐེངས་…
སངས་རྒྱས་སྨན་བླའི་གཟུངས་སྔགས་གསོག་སྒྲུབ་ཀྱི་གསལ་བསྒྲགས།
༄༅། །རྒྱ་ཆེའི་བོད་ཀྱི་གསོ་བ་རིག་པའི་རྒྱུད་འཛིན་འཚོ་བྱེད་སྨན་པ་ཡོངས་ཀྱི་སྙན་ལམ་དུ། ཞུ་གསོལ། ཕྱི་ལོ་༢༠༡༩ ཟླ་༤ ཚེས་༨ ནས་ཚེས་༡༡ བར་བོད་ཀྱི་གསོ་བ་རིག་པའི་ལྷན་ཚོགས་ཀྱི་ཚོགས་ཐེངས་༣༡ པ་དེ་ བསྐོང་ཚོགས་ཀྱིས་ཚོགས་འདུའི་གྲོས་ཆོད་དོན་ཚན་༣།ཀ ནང་གསལ་ཕྱི་ལོ་༢༠༡༩ ཟླ་༩ ཚེས་༡༡ ཉིན་བོད་ཀྱི་ གསོ་བ་རིག་པའི་ལྷན་ཚོགས་ནས་གསོ་བ་རིག་པའི་ཉིན་མོ་སྲུང་རྩི་ཞུ་རྒྱུ་ཡིན་པའི་ཉིན་མོ་དེའི་ཐོག་གསོ་རིག་ལྷན་ ཚོགས་ནས་༸སྤྱི་ནོར་༸གོང་ས་སྐྱབས་མགོན་༸སྐུ་འཕྲེང་བཅུ་བཞི་པ་ཆེན་པོ་མཆོག་ལ་བོད་ཀྱི་གསོ་བ་རིག་པའི་ བསྟན་པའི་མེ་རོ་རྨང་ནས་གསོས་གནང་མཛད་ཅིང་བོད་ཀྱི་གསོ་བ་རིག་པའི་བསྟན་པ་འདི་ཉིད་མི་ཉམས་དར་སྤེལ་ལ་བཀའ་དྲིན་འཇལ་ཐབས་བྲལ་བའི་སྐུ་དྲིན་རྗེས་དྲན་ཞུ་བ་དང་། དམིགས་བཀར་མགོན་པོ་གང་ཉིད་འདི་ལོ་དགུང་ ཀེག་དངོས་གཞིའི་ཚུལ་བསྟན་སྐུ་གེགས་ཀྱི་མཚན་མ་ཅི་མཆིས་རྨེག་མེད་དུ་ཞི་ནས་སྐུ་ཚེ་༸རྒྱལ་བ་ཚེ་མཐའ་ཡས་པའི་ངོ་བོར་བརྟན་པ་དང་ཐུགས་ཀྱི་བཞེད་དགོངས་མཐའ་དག་གེགས་མེད་ལྷུན་གྱིས་འགྲུབ་པའི་ཆེད་དུ་རང་རེ་བོད་ཀྱི་གསོ་བ་རིག་པའི་འཚོ་བྱེད་སྨན་པ་རྣམས་ནས་སངས་རྒྱས་སྨན་བླའི་གཟུངས་སྔགས་གྲངས་གསོག་དང་དེ་བཞིན་ཁྱབ་ཁོངས་སྨན་པ་རྣམས་ཀྱི་ཚབ་ཞུས་ཏེ་ལྷན་ཚོགས་ནས་དཔལ་ལྡན་དགའ་ལྡན་ཕོ་བྲང་བརྒྱུད་ནས་༸གོང་ས་ ༸སྐྱབས་མགོན་ཆེན་པོ་མཆོག་ལ་སངས་རྒྱས་སྨན་བླའི་སྐུ་བརྙན་འབུལ་བའི་སྒོ་ནས་བརྟན་བཞུགས་བསྟར་འབུལ་ གྱི་མནྜལ་རྟེན་དོད་བཅས་འབུལ་གཏན་འཁེལ་ཡོད་ན་འབྲེལ་ཡོད་སྨན་པ་རྣམས་ནས་སངས་རྒྱས་སྨན་བླའི་ གཟུངས་སྔགས་གྲངས་གསོག་གིས་གྲངས་ཐོ་དང་སྨན་པ་ངོ་རེ་ནས་སེར་སྣ་དང་གཏམ་དོན་སོགས་ཀྱི་དྲི་མས་མ་ གོས་པར་བསམ་པ་རྣམ་དག་གིས་བློས་བཅད་ཞལ་འདེབས་བཅས་ལྷན་ཚོགས་ཀྱི་ལས་ཁུངས་སམ་ཡང་ན་ཁྱབ་ ཁོངས་ས་གནས་འབྲེལ་མཐུད་པ་བརྒྱུད་ནས་ཕྱི་ལོ་༢༠༡༩ ཟླ་༨ ཚེས་༡༥ འགྱངས་མེད་བསྐུར་གནང་ཡོང་བའི་ ཡོངས་ཁྱབ་གསལ་བསྒྲགས་སུ། བོད་ཀྱི་གསོ་བ་རིག་པའི་ལྷན་ཚོགས་ཀྱི་ཡིག་ཚང་ནས་ཕྱི་ལོ་༢༠༡༩ ཟླ་༤ ཚེས་༣༠ ལ་ཕུལ།།
བཅར་འདྲི་གླེང་མོལ།
རྒྱལ་སྤྱིའི་བོད་ཀྱི་གསོ་བ་རིག་པའི་བགྲོ་གླེང་ཚོགས་ཆེན་ཐེངས་གསུམ་པ་བསྐོང་ཚོགས་སྟབས་སྟུན་བོད་ཀྱི་གསོ་བ་རིག་པའི་ལྷན་ཚོགས་ནས་དེབ་སྐྱེལ་ཡོད་པའི་གསོ་རིག་སློབ་གཉེར་ཁང་གི་སྨན་སློབ་དང་ཚོགས་ཆེན་ཐོག་གསུང་བཤད་གནང་མཁན་མཁས་དབང་ཁག་ཅིག་དབར་ཆེད་ལས་ལོ་རྒྱུས་དང་ཉམས་མྱོང་། མ་འོངས་གདོང་ལེན་བྱེད་ཕྱོགས་ཐོག་བཅར་འདྲི་གླེང་མོལ་གི་ལས་རིམ་ཞིག་ཟུར་དུ་གོ་སྒྲིག་ཞུས་པའི་གླེང་མོལ་རྣམས་ཕྱོགས་སྒྲིག་ཞུས་པ་གཤམ་གསལ། ༡། དབུས་གཞུང་ནང་པའི་མཐོ་རིམ་སློབ་གཉེར་ཁང་གི་སྨན་སློབ་རྣམས་ནས་ཚེ་ཡི་རིག་བྱེད་ཀྱི་མཁས་དབང་སློབ་དཔོན་སན་ཇི་བ་ར་ས་ཏོ་གི་ལ་བཅར་འདྲི་ཞུས་པ། ༢། ལྕགས་པོ་རི་བོད་སྨན་སློབ་གཉེར་ཁང་གི་སྨན་སློབ་རྣམས་ནས་སྨན་རམས་པ་རྡོ་རྗེ་རབ་བརྟན་ལགས་སུ་བཅར་འདྲི་ཞུས་པ། ༣། བོད་ཀྱི་སྨན་རྩིས་མཐོ་སློབ་ཁང་གི་སྨན་སློབ་ནས་སྐུ་ཞབས་ཧ་བཊ་ཤཻ་བལ་དང་གླེང་མོལ་ཞུས་པ། ༤། བོད་ཀྱི་ཆེས་མཐོའི་གཙུག་ལག་སློབ་གཉེར་ཁང་གི་སྨན་སློབ་རྣམས་ནས་ཉམས་ཞིབ་པ་བསྟན་འཛིན་ཆོས་སྒྲོན་ལགས་ དང་གླེང་མོལ་ཞུས་པ། ༥། སྨན་རི་གླིང་འབུམ་བཞིའི་མཐོ་སློབ་ཀྱི་སྨན་སློབ་ནས་ཊོག་ཌར་ཨེ་ཌ་ཝ་ཌ་ལགས་དང་གླེང་མོལ་ཞུས་པ། བཅས་སྨན་སློབ་དང་བཅར་འདྲི་གླེང་མོལ་ལ་མཉམ་བཞུགས་གནང་མཁན་མཁས་དབང་རྣམ་པ་པ་ཚང་མར་ཐུགས་རྗེ་ཆེ་ཞེས་ཞུ།།
གསོ་རིག་འབུམ་བཞིའི་མཐོ་སློབ་ཏུ་རྟོགས་ཞིབ།
བོད་ཀྱི་གསོ་བ་རིག་པའི་ལྷན་ཚོགས་ཀྱི་ཁྲིམས་སྒྲིག་དགོངས་དོན་ཕྱི་ལོ་༢༠༡༨ ཟླ་༡༡ ཚེས་༢ ཉིན་ལྷན་ཚོགས་ནས་ཆེད་བསྐོས་རྟོགས་ཞིབ་ཚོགས་ཆུང་གི་ཚོགས་མི་རྣམས་གསོ་རིག་འབུམ་བཞིའི་མཐོ་སློབ་སྨན་རིའི་གླིང་དུ་རྟོགས་ཞིབ་ཆེད་བསྐྱོད་གནང། རྟོགས་ཞིབ་ཚོགས་ཆུང་གི་ཚོགས་མིའི་ཁོངས་ལྷན་ཚོགས་ཀྱི་རྒྱུན་ལས་དྲུང་ཆེ་སྨན་པ་ཚེ་རིང་མཚམས་གཅོད་དང་བོན་གཞིས་ས་གནས་འགོ་འཛིན་སྐུ་ངོ་བློ་ལྡན་ཉི་མ་ལགས། ལྷན་ཚོགས་འོག་དེབ་སྐྱེལ་ཚོགས་མི་སྨན་རམས་པ་སྐྱིད་ལུས་ལགས་བཅས་ཡིན། ཚོགས་ཆུང་གི་ཚོགས་མི་རྣམས་ཟླ་༡༡ ཚེས་༡ སྔ་དྲོ་རྡ་ས་ནས་ཐོན་ནས་དེ་ཉིན་གྱི་དགོངས་མོ་ཕྱག་ཚོད་༧།༤༠ ཐོག་གསོ་རིག་འབུམ་བཞིའི་མཐོ་སློབ་དུ་འབྱོར་ཞིང་དེར་མཐོ་སློབ་སློབ་མ་དང་དགེ་ལས་རྣམས་ནས་སྣེ་ལེན་ཞུས་གནང། ཕྱི་ཚེས་༢ སྔ་དྲོ་ཕྱག་ཚོད་༨།༤༥ ཐོག་ མཐོ་སློབ་ཀྱི་འགན་འཛིན་མཆོག་ནས་རྟོགས་ཞིབ་ཚོགས་མི་རྣམ་པ་༸སྐྱབས་རྗེ་སྨན་རི་ཁྲི་འཛིིན་མཆོག་གི་དམིགས་བསལ་མཇལ་ཁ་གོ་སྒྲིག་གནང་བརརིན་པོ་ཆེ་མཆོག་ལ་ད་ལན་རྟོགས་ཞིབ་ཀྱི་ལས་དོན་དང་རྒྱ་གར་དབུས་གཞུང་ནས་གསོ་བ་རིག་པའི་བསླབ་གཞི་རྩ་འཛིན་གཏན་འབེབས་དང་མཐོ་སློབ་དེབ་སྐྱེལ། དེ་བཞིན་གསོ་རིག་མཐོ་སློབ་ བཞི་ནས་སློབ་ཐོན་སྨན་པ་རྣམས་དེབ་སྐྱེལ་སྒོ་འཛུགས་བཅས་ཀྱི་སྐོར་སྙན་གསེང་དང་ལྷན་ཚོགས་ནས་དཔར་བསྐྲུན་དུས་དེབ་ཁག་བཅས་ཕུལ་བཞེས་གནང། ༸སྐྱབས་རྗེ་སྨན་རི་ཁྲི་འཛིན་མཆོག་ནས་ཀྱང་༸སྐྱབས་རྗེ་གོང་མ་སྨན་རི་ཁྲི་འཛིན་སོ་གསུམ་པ་མཆོག་ནས་གསོ་རིག་འབུམ་བཞིའི་སློབ་གཉེར་མི་ཉམས་རྒྱུན་སྤེལ་གྱི་ཐུགས་དགོངས་ཆེ་ བཞེས་ཡོད་པ་བཞིན་ཕྱི་ལོ་༢༠༡༤ ལོར་མཐོ་སློབ་འདི་དངོས་སུ་སྒོ་འཛུགས་ཀྱིས་ད་ལྟ་རྒྱུན་མཐུད་འགྲོ་བཞིན་ཡོད་པ་གསུངས། དེ་རྗེས་ཕྱག་ཚོད་༩།༡༥ཐོག་རྟོགས་ཞིབ་ཚོགས་མི་རྣམ་པ་མཐོ་སློབ་ཀྱི་འཛིན་སྐྱོང་ཡིག་ཚང་དུ་ཚང་འཛོམས་ཐོག་རྟོགས་ཞིབ་གཙོ་སྐྱོང་ནས་ད་ལན་རྟོགས་ཞིབ་ཀྱི་དམིགས་ཡུལ་དང་འབྲེལ་རྟོགས་ཞིབ་ལས་རིམ་ངོ་སྤྲོད་ཞུས། ཆབས་ཅིག་མཐོ་སློབ་ཀྱི་འགན་འཛིན་དང་སྨན་རི་དགོན་པའི་འཛིན་སྐྱོང་གི་འགན་འཛིན་ལྷན་ཚོགས་ཀྱི་ཚོགས་གཞོན་དང་ཚོགས་མི་ལྷན་འཛོམས་ཡོད་སྟབས་བསྟུན་ལྷན་ཚོགས་ནས་ཉེ་འཆར་རྒྱ་གར་དབུས་གཞུང་ནས་གསོ་བ་རིག་པའི་བསླབ་གཞི་རྩ་་འཛིན་དང་གསོ་རིག་སློབ་གཉེར་ཁང་གི་ཉུང་མཐའི་དགོས་མཁོའི་ཆ་རྐྱེན་སྒྲིག་གཞི། གསོ་རིག་སློབ་གཉེར་ཁང་བཞི་ནས་སློབ་ཐོན་སྨན་པ་རྣམས་དེབ་སྐྱེལ་སྒོ་འཛུགས། མ་འོངས་པ་གསོ་རིག་འབུམ་བཞིའི་མཐོ་སློབ་འདིའང་རྒྱ་གར་དབུས་གཞུང་གི་སྒྲིག་གཞི་གཏན་འབེབས་དེའི་འོག་འགྲོ་དགོས་པས་མཐོ་སློབ་འཛིན་སྐྱོང་ནས་ད་ལྟ་ནས་སྒྲིག་གཞི་དེར་གཟིགས་རྟོགས་ཀྱིས་གྲ་སྒྲིག་གནང་གལ་ཆེ་བ། དེ་ལྟར་གསོ་རིག་སློབ་གཉེར་ཁང་དེབ་སྐྱེལ་ཆེད་མཐོ་སློབ་དེ་མངའ་སྡེའི་ནང་གི་གཙུག་ལག་སློབ་གཉེར་ཁང་ཞིག་ནས་ཚད་འཛིན་ (Affiliation) གནང་དགོས་པ། དེ་བཞིན་མཐོ་སློབ་ཀྱི་ཆ་རྐྱེན་དུ་ནད་གསོ་ཁང་དགོས་པ། ནད་པ་བརྟག་དཔྱད་ཀྱི་སྒོ་བསྟེན་སྨན་ཁང་འཛུག་འཆར་ཡོད་ན་སྒོ་བསྟེན་སྨན་ཁང་མངའ་སྡེའམ་རྫོང་གི་འཕྲོད་བསྟེན་ལས་ཁུངས་ནས་དེབ་སྐྱེལ་ལག་འཁྱེར་ཞུ་དགོས་པ་སོགས་ཡུལ་ཁྲིམས་དང་མཐུན་པའི་གནང་སྒོ་ཁག་འགྲེལ་བརྗོད་ལམ་སྟོན་ཞུས། དེ་རྗེས་རྟོགས་ཞིབ་དངོས་གཞིའི་བརྒྱུད་རིམ་ནང་མཐོ་སློབ་ཀྱི་འཛིན་ཁང་དང་དཔེ་མཛོད། བརྟག་དཔྱད་སྨན་ཁང་དང་དཔྱད་བཅོས་ཁང། སློབ་མའི་ཉལ་ཁང་དང་རང་སྦྱོང་ཁང། ཚོགས་ཁང་དང་གསོལ་ཚིགས་ཁང། སྨན་རྒྱུ་དང་སྨན་སྦྱོར་ཁང་བཅས་ལ་རྟོགས་ཞིབ་གནང་། གསོ་རིག་འབུམ་བཞིའི་མཐོ་སློབ་སྨན་རི་གླིང་འདི་བཞིན་ཐོག་མར་ཕྱི་ལོ་༢༠༡༤ ཟླ་༥ ཚེས་༡༣ ཉིན་དངོས་སུ་སྒོ་འཛུགས་ཀྱིས་ད་ལྟའི་འཆར་སྨན་དགེ་གཉིས་འོག་སྨན་སློབ་སྐབས་དང་པོ་སྟེ་ལོ་རིམ་ལྔ་པའི་ནང་སློབ་མ་བུ་གྲངས་གསུམ་དང་བུ་མོ་གྲངས་ཅིག་བཅས་ཁྱོན་གྲངས་༤ སྨན་སློབ་སྐབས་གཉིས་པ་སྟེ་ལོ་རིམ་བཞི་པའི་ནང་སྨན་སློབ་བུ་གྲངས་གཉིས་དང་བུ་མོ་གྲངས་གསུམ་བཅས་བསྡོམས་གྲངས་༥སྐབས་གསུམ་པ་སྟེ་ལོ་རིམ་གཉིས་པའི་ནང་བུ་གྲངས་བཞི་དང་བུ་མོ་གྲངས་ཅིག་བཅས་བསྡོམས་༥ སྨན་སློབ་སྐབས་བཞི་པ་སྟེ་ལོ་རིམ་དང་པོའི་ནང་སྨན་སློབ་བུ་གྲངས་གཉིས་དང་བུ་མོ་གྲངས་ཅིག་བཅས་༣ ཁྱོན་བསྡོམས་སྨན་སློབ་གྲངས་༡༧…
དཔལ་སྤུངས་རིག་གནས་མཐོ་སློབ་ཁང་དུ་རྟོགས་ཞིབ།
ཕྱི་ལོ་༢༠༡༨ ཟླ་༧ ཚེས་༤ ཉིན་དཔལ་སྤུངས་རིག་གནས་མཐོ་སློབ་དོན་གཉིས་ནོར་བུའི་དགའ་ཚལ་ནས་དེ་གའི་ གསོ་རིག་སློབ་གཉེར་ཁང་དེ་བོད་ཀྱི་གསོ་བ་རིག་པའི་ལྷན་ཚོགས་འོག་དེབ་སྐྱེལ་ཡོང་བའི་ཞུ་སྙན་གནང་འབྱོར་བྱུང་བར་ལྷན་ཚོགས་ཚོགས་ཐེངས་༣༠ པའི་ཐོག་རྟོགས་ཞིབ་ཚོགས་མི་དང་རྟོགས་ཞིབ་དུས་ཚེས་གཏན་འབེབས་ཀྱིས་ ད་ཉིན་ཕྱི་ལོ་༢༠༡༨ ཟླ་༡༠ ཚེས་༡༩ ཉིན་དངོས་སུ་རྟོགས་ཞིབ་ཆེད་ཕེབས་གནང་ཡོད། རྟོགས་ཞིབ་ལས་རིམ་ནང་གསལ་ཐོག་མར་རྟོགས་ཞིབ་ཚོགས་ཆུང་གི་གཙོ་སྐྱོང་ལྷན་ཚོགས་ཀྱི་དྲུང་ཆེ་སྨན་པ་ཚེ་རིང་མཚམས་གཅོད་ནས་རྟོགས་ཞིབ་ཚོགས་མི་རྣམས་ངོ་སྤྲོད་དང་རྟོགས་ཞིབ་ཀྱི་རྒྱབ་ལྗོངས་དང་ལས་དོན་ངོ་སྤྲོད་ ཞུས། དེ་རྗེས་དཔལ་སྤུངས་རིག་གནས་མཐོ་སློབ་ཀྱི་སློབ་སྤྱི་སྨན་རྩིས་རབ་འབྱམས་པ་ཨེ་པ་བསོད་ནམས་རིན་ཆེན་ལགས་ནས་དཔལ་སྤུངས་རིག་གནས་མཐོ་སློབ་ཁང་གི་དམིགས་ཡུལ་དང་འབྲེལ་ཡོད་དགེ་ལས་རྣམས་ངོ་སྤྲོད་གནང་། ཚོགས་ཆུང་གི་ཚོགས་མི་རྣམས་ནས་དེབ་སྐྱེལ་སྒྲིག་གཞི་དང་དེ་བཞིན་ཞུ་སྙན་ནང་གསལ་ཡིག་ཆ་ངོ་མར་གཟིགས་ཞིབ་དང་དོགས་འདྲི་ཡོད་པར་དྲི་བ་ལན་འདེབས་གནང་། དེ་རྗེས་སློབ་ཁང་དུ་དངོས་སུ་རྟོགས་ཞིབ་གནང་བའི་ནང་མཐོ་སློབ་ཡིག་ཚང། རིག་དངོས་འགྲེམས་སྟོན་ཁང། གཡུ་ཐོག་མཆོད་ཁང་དང་དཔེ་མཛོད། སློབ་མའི་འཛིན་ཁང་དང་ཉལ་ཁང། དེ་བཞིན་བརྟག་དཔྱད་སྨན་ཁང་དང་འཇམ་དཔྱད་ཁང། སྨན་སྦྱོར་ཁང་དང་གཡོས་སྦྱོར་ཁང། ཡིད་འཕྲོག་སྨན་གྱི་ལྡུམ་ར་བཅས་ལ་དངོས་སུ་གཟིགས་རྟོགས་གནང་མཐར་ཚོགས་ཆུང་ཚོགས་མི་ཚང་འཛོམས་ཀྱིས་སློབ་ཁང་གི་འཛིན་སྐྱོང་དང་དེ་བཞིན་ཤེས་ཡོན་དང་འབྲེལ་བའི་ཐོག་དོགས་འདྲི་དང་སློབ་ཁང་གི་སློབ་མ་གཉིས་ཟུར་དུ་ཐུགས་ཕྲད་ཀྱིས་སློབ་ཁང་གི་སློབ་འཁྲིད་སློབ་ཚན་དང་སློབ་འཁྲིད་གནང་སྟངས་སོགས་ཤེས་ཡོན་སྤྱི་དང་། ཡང་སྒོས་འཛིན་སྐྱོང་ནས་ཟུར་བལྟའི་དཔེ་དེབ་དང་ཉལ་ཁང་ལ་སོགས་ཀྱི་ཆ་རྐྱེན་གནང་སྟངས་གང་ཅིར་དྲི་བ་ཞུས་རྗེས་མཐར་ཚོགས་ཆུང་གི་སྙན་ཐོ་དང་ཚོགས་མི་སོ་སོའི་དགོངས་འཆར་སྙན་ཤོག་བཅས་བཀང་། ད་ལན་རྟོགས་ཞིབ་འདི་དང་འབྲེལ་ནས་སློབ་ཁང་ནས་༸བྱམས་མགོན་རྡོ་ཆེ་འཆང་མཆོག་སྐུའི་དམིགས་བསལ་མཇལ་ཁ་གོ་སྒྲིག་གནང་བཞིན་༸བྱམས་མགོན་ཏཱའི་སི་ཏུ་རིན་པོ་ཆེ་མཆོག་ནས་དེ་སྔ་བོད་ནང་དཔལ་སྤུངས་རིག་གནས་མཐོ་ སློབ་ཁང་གི་བྱུང་བ་ལོ་རྒྱུས་དང་བོད་དུ་དུས་འགྱུར་བྱུང་རྐྱེན་བཙན་བྱོལ་དུ་བྲོས་བྱོལ་གྱིས་རྒྱ་གར་ནང་དཔལ་སྤུངས་རིག་གནས་མཐོ་སློབ་འདི་གསར་འཛུགས་ཀྱི་དམིགས་ཡུལ་དང་ལས་དོན་གནང་སྒོ་ཁག འབྱུང་འགྱུར་གསོ་རྩིས་རིག་པ་གཙོས་བོད་ཀྱི་རིག་གནས་མི་ཉམས་གོང་སྤེལ་གནང་རྒྱུའི་ལས་འཆར་སོགས་དུས་ཡུན་ཆུ་ཚོད་གཅིག་ཙམ་རིང་བཀའ་སློབ་གནང་། ད་ལན་རྟོགས་ཞིབ་ཚོགས་ཆུང་ནས་རྟོགས་ཞིབ་གནང་བའི་རྟོགས་ཞིབ་ལས་བསྡོམས་སྙན་ཐོ་དང་རྒྱབ་གཉེར། ཟུར་སྦྱར་ཡིག་ཆ་ཁག་བཅས་ལྷན་ཚོགས་ཀྱི་རྗེས་མའི་ཚོགས་འདུའི་ཐོག་གྲོས་བསྡུར་ཐག་ གཅོད་གནང་རྒྱུ་ཡིན་པ་བཅས་རྟོགས་ཞིབ་ལས་བསྡོམས་སྙིང་བསྡུས་སུ་བོད་ཀྱི་གསོ་བ་རིག་པའི་ལྷན་ཚོགས་ནས་ཕྱི་ལོ་༢༠༡༨ ཟླ་༡༠ ཚེས་༢༠ ལ།། …
རྒྱལ་ཡོངས་གསོ་བ་རིག་པའི་ཉིན་མོ་སྲུང་རྩི།
རྒྱལ་ཡོངས་གསོ་བ་རིག་པའི་ཉིན་མོ་བསྲུང་བརྩི། འཇིག་རྟེན་གྱི་ཁམས་ཀྱི་བྱ་བ་དང་དངོས་པོ་ཐམས་ཅད་ཡུལ་དང་དུས་དང་གནས་སྐབས་ཀྱི་གཞན་དབང་ཤ་སྟག་ཡིན། ལོ་རྒྱུས་སུ་གསལ་བའི་བྱ་དངོས་རྣམས་ནི་ད་ལྟ་དངོས་སུ་མིག་སྔར་མི་མངོན་ཡང་གནས་སྐབས་དེར་མངོན་སུམ་ཡིན་ཅིང་། དེ་ནི་ད་ལྟ་དངོས་སུ་ཕན་བདེ་མྱོང་བཞིན་པའི་དུས་དང་བྱ་བ་མཐའ་དག་སྟེར་བ་པོ་རེད། བྱ་དངོས་དེར་སྐྱར་ལོག་གིས་སྤྱོད་ཐབས་མེད་ཀྱང་དེའི་དུས་དང། དུས་དེར་འགྲོ་བ་མི་རིགས་དེ་དང་དེའི་ནམ་ཡང་ཕན་བདེའི་རྩ་བར་གྱུར་བའི་བྱ་བ་དང། དངོས་པོ་བསྒྲུབ་པ་པོའི་སྐྱེས་བུ་ཁྱད་པར་ཅན་དེ་ཉིད་རྗེས་དྲན་བྱེད་པ་ནི་འཛམ་གླིང་འགྲོ་བ་མིའི་སྤྱི་ཚོགས་དང་རྒྱལ་ཁབ་ཀྱི་སྤྱོད་བཟང་ཞིག་ཡིན། དཔེར་ན་སྟོན་པ་ཤཱཀྱ་ཐུབ་པ་དང་ཡེ་ཤུའི་སྟོན་པ་སོགས་ཀྱི་འཁྲུངས་ཚེས་དང་དེ་དག་གི་མཛད་པ་ཁྱད་པར་ཅན་རྣམས་ད་ལྟའང་རྗེས་དྲན་བྱེད་པ་དང། འཛམ་གླིང་འཕྲོད་བསྟེན་དང་། དགེ་རྒན་དང་ཕ་མའི་དུས་སྟོན་དང་། དེ་བཞིན་རྒྱལ་ཁབ་སོ་སོའི་གཞན་དབང་གི་འཆིང་བ་ལས་གྲོལ་ནས་རང་དབང་བདེ་སྐྱིད་ཀྱི་དཔལ་གསར་དུ་ཐོབ་པའི་དུས་ཚེགས་དྲན་གསོ་དང། ཁྱད་པར་དུ་རང་རེ་གདོང་དམར་བོད་མི་རིགས་ཀྱི་རིག་གཞུང་ཁྲོད་དུ་ལོ་རྒྱུས་སུ་གསལ་བའི་ཡུལ་དུས་གནས་སྐབས་རྗེས་དྲན་དང། རླབས་ཆེན་གྱི་མི་སྣ་དེ་དག་ནུབ་པ་མེད་པར་ནམ་ཡང་མིག་སྔར་ཀྲོང་ངེར་གསལ་བའི་དྲན་རྟེན་བཞེངས་པ་སོགས་ལམ་སྲོལ་ཡོད་པ་དཔེར་ན། སྟོན་པ་སངས་རྒྱས་ཀྱིས་མཉན་ཡོད་ཆོ་འཕྲུལ་གྱི་མཛད་པ་རྗེས་སུ་དྲན་པ་ལྷ་ལྡན་ཆོ་འཕྲུལ་སྨོན་ལམ་ཆེན་མོ། བཙན་པོ་ཁྲི་སྲོང་ལྡེའུ་བཙན་གྱི་བློན་ཆེན་སྟག་སྒྲ་ཀླུ་གོང་གི་རྒྱ་ནག་ཐང་གི་རྒྱལ་ས་ཕབས་ཏེ་བོད་ཀྱི་དཔྱ་བསྡུ་བ་སོགས་དཔའ་བོའི་མཛད་པ་རྗེས་དྲན་ཕོ་བྲང་པོ་ཏཱ་ལའི་རྡོ་རིང་སོགས་མཐའ་ཡས་པ་ཞིག་དུས་ད་ལྟའང་བྱེད་པ་མཐོང་རྒྱུ་ཡོད། དེ་ལ་དུས་རབས་ཉི་ཤུ་པར་རྒྱ་ནག་གི་དམག་དཔུང་སྟོབས་ཤུགས་ཀྱིས་བོད་རྒྱལ་ཁབ་ཡོངས་རྫོགས་བཙན་བཟུང་བྱས་ཏེ་བོད་ཀྱི་ཆོས་དང་རིག་གཞུང་མི་རིགས་དང་བཅས་པ་རྩ་མེད་དུ་འགྲོ་བའི་གཉན་འཕྲང་ཡ་ང་བར་གྱུར་ཚེ་༸གོང་ས་རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་སྟོན་འཁོར་འགའ་ཞིག་རྒྱ་གར་དུ་བཙན་བྱོལ་དུ་འབྱོར་བར་རྒྱ་གར་གཞུང་དང་མི་དམངས་ཀྱིས་ཐུགས་བརྩེ་བ་ཆེན་པོས་རྗེས་སུ་བཟུང་སྟེ་སྐྱབས་བཅོལ་གཞིས་སྒར་འཛུགས་འཐུས་བཀའ་དྲིན་བསྐྱང་བ་བཞིན། དེ་དག་ཏུ་ཆོས་དང་རིག་གཞུང་གི་བསྟི་གནས་བོད་ཀྱི་གཏན་སློབ་ཁག་དང་། གདན་ས་དང་བཤད་གྲ་དུ་མ་གསར་འཛུགས་བཀའ་དྲིན་བསྐྱངས་པ་དང་། རླབས་ཆེན་གྱི་མཛད་པ་དེ་དག་གི་ཡ་གྱལ་རིས་མེད་སྐྱེ་དགུའི་ཕན་བདེའི་རྩ་ལག་བོད་ཀྱི་ཐུན་མོང་མིན་པའི་སྨན་རྩིས་ཀྱི་རིག་པ་འདི་ཉིད་སྐྱར་གསོའི་སླད་སྐྱབས་བཅོལ་དུ་ཞབས་ཕྱིར་འབྲངས་པའི་སྨན་རྩིས་མཁས་པ་རྣམས་རྡ་རམ་སཱ་ལཱར་བསྡུ་བསྐོང་མཛད་དེ་སྤྱི་ལོ་༡༩༦༡ ཟླ་༩ ཚེས་༡༡ ཉིན་འཕགས་ཡུལ་དུ་བོད་ཀྱི་སྨན་རྩིས་བསྟན་པ་སླར་གསོའི་མཛད་འཆར་བཀའ་དྲིན་བསྐྱང་བ་ཁུངས་ལྡན་གཞུང་འབྲེལ་ཡིག་ཆ་ཁག་ཏུ་གསལ་བ་བཞིན། བོད་ཀྱི་གསོ་བ་རིག་པའི་ལྷན་ཚོགས་ཀྱི་ཚོགས་ཐེངས་༣༠ པའི་གྲོས་ཆོད་དོན་ཚན་༣ དགོངས་དོན་གོང་གསལ་གྱི་དུས་ཚེས་དེ་རྒྱལ་ཡོངས་གསོ་བ་རིག་པའི་ཉིན་མོར་གཏན་འབེབས་བྱས་པ་དང་། ཉིན་མོ་དེར་འབྲེལ་ཡོད་ཚང་མས་དུས་ཚེགས་སྲུང་རྩིའི་སྒོ་ནས་༸གོང་ས་སྐྱབས་མགོན་ཆེན་པོའི་བཀའ་དྲིན་རྗེས་དྲན་དང་། དུས་ཚེགས་སྲུང་རྩིའི་དགོས་པ་གཙོ་བོ་སྔོན་བྱོན་བོད་ཀྱི་ཡབ་མེས་རྣམས་ཀྱི་རྣམ་ཐར་ལ་རྗེས་སུ་བསླབས་ཏེ་གསོ་བ་རིག་པའི་ལུང་རྟོགས་ཀྱི་བསྟན་པ་འདི་ཉིད་མི་ཉམས་གོང་འཕེལ་སླད་འཁོར་ལོ་གསུམ་གྱི་བྱ་བ་ལྷོད་པ་མེད་པར་སྐྱོང་བ་ཞུ། བོད་ཀྱི་གསོ་བ་རིག་པའི་ལྷན་ཚོགས་ནས་ཕྱི་ལོ་༢༠༡༨ ཟླ་༩ ཚེས་༧ ལ།།
དེབ་སྐྱེལ་འཕར་འགྱངས་ཀྱི་གསལ་བསྒྲགས།
༄༅། །བོད་ཀྱི་གསོ་རིག་པའི་ལྷན་ཚོགས་འོག་དེབ་སྐྱེལ་ཡོད་པའི་གསོ་རིག་སྨན་པ་རྣམས་ལ། ཆེད་ཞུ། བོད་ཀྱི་གསོ་བ་རིག་པའི་ལྷན་ཚོགས་ཀྱི་ཁྲིམས་ཡིག་དོན་ཚན་དགུ་པ་དང་བཅུ་པའི་དགོངས་དོན་གསོ་རིག་སློབ་གཉེར་ཁང་ནས་སློབ་ཐོན་སྨན་པ་རྣམས་ལོ་གཅིག་ནང་ཚུད་ལྷན་ཚོགས་འོག་སྨན་པའི་དེབ་སྐྱེལ་གནང་དགོས་པར་ད་བར་ཁྱོན་སྨན་པ་གྲངས་༤༩༡ ལྷན་ཚོགས་འོག་དེབ་སྐྱེལ་ཞུས་སྤྲོད་ཟིན། དེབ་སྐྱེལ་སྨན་པ་རྣམས་ནས་དགོངས་འཆར་ཕེབས་བཞིན་ཕྱི་ལོ་༢༠༡༡ ལོར་གསོ་རིག་ལྷན་ཚོགས་ནས་སྨན་པའི་དེབ་སྐྱེལ་ལག་འཁྱེར་གསར་པ་སྟབས་བདེ་ཞིག་བཟོས་བསྐྲུན་གྱིས་དེབ་སྐྱེལ་ལག་འཁྱེར་སྟེང་ལོ་གསུམ་རེའི་མཚམས་འཕར་འགྱངས་ཐལ་རྩེ་སྦྱར་དགོས་པས་དེ་སྔ་ཕྱི་ལོ་༢༠༡༥ ལོར་འཕར་འགྱངས་ཐེལ་རྩེ་དེ་བཞིན་ཕྱི་ལོ་༢༠༡༨ ཟླ་༣ ཚེས་༣༡ ནས་དུས་ཚེས་དུས་བཀག་གཙང་བཞིན་ཡོད་ན་ལྷན་ཚོགས་འོག་དེབ་སྐྱེལ་ཡོད་པའི་གསོ་རིག་སྨན་པའི་རྣམས་ནས་འཕར་འགྱངས་ཐེལ་རྩེའི་དོད་ ཧིན་སྒོར་༡༠༠།༠༠ ལྷན་ཚོགས་སུ་འབུལ་ཐོག་དེབ་སྐྱེལ་འཕར་འགྱངས་ཐེལ་རྩེ་བཞེས་གནང་ཡོང་བ་ དེ་དོན་གསལ་བསྒྲགས་ཞུ། ཉེ་འཆར་ཕྱི་ཟླ་བཞི་པ་འདིའི་ནང་དེབ་སྐྱེལ་གནང་བའི་སྨན་པ་རྣམས་ནས་ཐེལ་རྩེ་འདི་ཞུ་མི་དགོས་པ་དེ་དོན་དགོངས་འཇགས་ཞུ། དེབ་སྐྱེལ་ཟིན་པའི་སྨན་པ་རྣམས་ནས་རང་ཉིད་ཀྱི་གནས་ཡུལ་ཁ་བྱང་དང་གློག་འཕྲིན་ཁ་བྱང་། དེ་བཞིན་འབྲེལ་ཡུལ་ཁ་པར་ཨང་གྲངས་ལ་བསྒྱུར་བ་ཕྱིན་ཡོད་ཚེ་ལྷན་ཚོགས་སུ་ངེས་པར་ཁ་བསྐོང་ (update) གནང་དགོས་པ་དང་ཆབས་ཅིག་སོ་སོའི་ཆེད་ལས་ལོ་རྒྱུས་ཐད་ཁ་བསྐོང་གནང་དགོས་མཆིས་ཚེ་ལྷན་ཚོགས་ཀྱི་གློག་འཕྲིན་ཁ་བྱང་འདིའི་ཐོག་(cctm2004@gmail.com)ཐོག་གཏོང་གནང་ཡོང་བ་དེ་དོན་རེ་སྐུལ་ཞུ་རྒྱུ་བཅས་བོད་ཀྱི་གསོ་བ་རིག་པའི་ལྷན་ཚོགས་ནས་ཕྱི་ལོ་༢༠༡༨ ཟླ་༤ ཚེས་༣༠ ལ་ཕུལ།།
ལྷན་ཚོགས་ཚོགས་ཐེངས་ཉེར་དགུ་པ།
བོད་ཀྱི་གསོ་བ་རིག་པའི་ལྷན་ཚོགས་ཀྱི་ཁྲིམས་སྒྲིག་དགོངས་དོན་ལྷན་ཚོགས་ཚོགས་ཐེངས་༢༩ པ་དེ་བཞིན་རྒྱལ་སྤྱིའི་བོད་ཀྱི་གསོ་བ་རིག་པའི་བགྲོ་གླེང་ཚོགས་ཆེན་ཐེངས་གསུམ་པ་བསྐོང་ཚོགས་བསྟུན་ཝཱ་ཎ་དབུས་བོད་ཀྱི་གཙུག་ལག་སློབ་གཉེར་ཁང་གི་གསོ་བ་རིག་པའི་སྡེ་ཚན་དུ་བསྐོང་ཚོགས་གནང་ཡོད། ཚོགས་འདུའི་ཐོག་གྲོས་བསྡུར་བྱུང་བའི་གྲོས་གཞི་གཤམ་གསལ། རྒྱ་གར་མངའ་སྡེའི་ཨཱ་ཡུ་ཤའི་སྨན་ཁང་ནང་གསོ་བ་རིག་པའི་སྒོ་བསྟེན་སྨན་ཁང་འཛུག་འཆར། ལྷན་ཚོགས་སུ་སློབ་སྟོན་པ་དང་ས་གནས་འབྲེལ་མཐུད་པ་འཕར་འགྱངས་དང་གསར་བསྐོ། རྒྱ་གར་གཙུག་ལག་སློབ་གཉེར་ཁང་དུ་གསོ་བ་རིག་པའི་སྡེ་ཚན་འཛུག་འཆར། ལྷན་ཚོགས་ཀྱི་ལས་དོན་བྱེད་ཕྱོགས་ཀྱི་རྩ་འཛིན་སྒྲིག་གཞིར་བསྐྱར་ཞིབ། རྒྱལ་སྤྱིའི་ཚོགས་ཆེན་ཐེངས་གསུམ་པ་བསྟུན་ཆེད་ལས་ཚོགས་འདུ་བསྐོང་ཚོགས་གནང་བའི་ཚོགས་འདུའི་ཚིག་ཐོར་བསྐྱར་ཞིབ་ལག་བསྟར། ནད་གཞི་སྔོན་འགོག་གི་ལས་འཆར། ལྷན་ཚོགས་ཀྱི་དམིགས་བསལ་ཚོགས་འདུ་བསྐོང་འཚོག་གནང་འཆར་གྱི་གྲོས་གཞི་གཏན་འབེབ། ལྷན་ཚོགས་ཀྱི་དཔལ་འབྱོར་འདུ་འགོད། གལ་ཆེའི་གྲོས་གཞི་གཞན། ལྷན་ཚོགས་ཀྱི་ཁྲིམས་ཡིག་བསྐྱར་བཅོས་དགོངས་དོན་ཚོགས་ཐེངས་འདིའི་ཐོག་ལྷན་ཚོགས་སུ་གསར་དུ་འདེམས་བསྐོས་བྱུང་བའི་ཚོགས་མི་སྨན་རམས་པ་འཕྲིན་ལས་གཡང་འབྱོར་དང་སྨན་པ་རབ་དགའ་ལགས་གཉིས་ལ་འཚམས་འདྲི་ཞུས་གནང་ཡོད། བོད་ཀྱི་གསོ་བ་རིག་པའི་ལྷན་ཚོགས་སུ་འཛིན་སྐྱོང་ཚོགས་མི་༡༣ ཡོད་པ་ལས་ད་ལན་ཚོགས་ཐེངས་འདིར་ཚོགས་མི་བཞི་དགོངས་ཞུས་ཀྱིས་ཚོགས་མི་གྲངས་༩ མཉམ་བཞུགས་གནང་ཐུབ་ཡོད། ལྷན་ཚོགས་ཀྱི་ཚོགས་ཐེངས་༢༠ པ་དེ་བཞིན་ཕྱི་ལོ་༢༠༡༨ ཟླ་༩ ཚེས་༣ ནས་ཚེས་༧ བར་བཞུགས་སྒར་རྡ་རམ་སཱ་ལཱར་བསྐོང་འཚོག་གནང་གཏན་འཁེལ་བ་བཅས་གོང་གསལ་ཚོགས་ཐེངས་༢༩ པའི་གལ་ཆེའི་གྲོས་གཞི་གྲོས་ཆོད་ཁག་ལྷན་ཚོགས་ཀྱི་གསོ་རིག་གསར་འཕྲིན་ནང་འདོན་སྤེལ་བྱ་རྒྱུ་ཡིན་པ་བཅས།།