བོད་ཀྱི་གསོ་བ་རིག་པའི་ལྷན་ཚོགས་ཀྱི་སྒྲིག་གཞི་དགོངས་དོན་ཕྱི་ལོ་༢༠༢༡ ཟླ་༡༡ ཚེས་༡༨ ཉིན་རྒྱབ་ལྷན་ཚོགས་ཀྱི་ཡིག་ཚང་དུ་འཛིན་སྐྱོང་ཚོགས་མི་རྣམས་ཟླ་རེའི་ཚོགས་འདུ་བསྐོང་ཚོགས་ཞུས་པའི་ཚོགས་འདུའི་གྲོས་གཞི་གཙོ་བོ་ཕྱི་ལོ་༢༠༢༢་་༢༣ ལོའི་ལས་འཆར་དང་སྔོན་རྩིས། ལྷན་ཚོགས་དབུ་བརྙེས་ནས་ལོ་༡༨ འཁོར་བའི་དུས་ཚིགས་སྲུང་བརྩི། གསོ་རིག་སློབ་གཉེར་ཁང་དང་སྨན་སྦྱོར་ཁང་དུ་རྟོགས་ཞིབ། རྒྱ་གར་དབུས་སའི་གཞུང་དང་འབྲེལ་བའི་ལས་དོན། རྩིས་ཞིབ་སྙན་ཐོར་ལན་འདེབས། སྨན་པ་དང་སྨན་རྫུས་བཀག་སྡོམ་དང་འབྲེལ་བའི་གྲོས་གཞིའི་ཐོག་གྲོས་བསྡུར་ཐག་གཅོད་བྱུང་ཡོད། ལྷན་ཚོགས་ཀྱི་ཚོགས་མི་ས་གནས་སུ་ཡོད་པ་རྣམས་ངོ་ཐོག་ཚོགས་བཅར་དང་གཞན་རྣམས་དྲ་ཐོག་ནས་ཚོགས་བཅར་མཉམ་ཞུགས་གནང་ཡོད་པ་བཅས།།
