༄༅། །རྒྱ་ཆེའི་བོད་ཀྱི་གསོ་བ་རིག་པའི་རྒྱུད་འཛིན་འཚོ་བྱེད་སྨན་པ་ཡོངས་ཀྱི་སྙན་ལམ་དུ། ཞུ་གསོལ། ཕྱི་ལོ་༢༠༡༩ ཟླ་༤ ཚེས་༨ ནས་ཚེས་༡༡ བར་བོད་ཀྱི་གསོ་བ་རིག་པའི་ལྷན་ཚོགས་ཀྱི་ཚོགས་ཐེངས་༣༡ པ་དེ་ བསྐོང་ཚོགས་ཀྱིས་ཚོགས་འདུའི་གྲོས་ཆོད་དོན་ཚན་༣།ཀ ནང་གསལ་ཕྱི་ལོ་༢༠༡༩ ཟླ་༩ ཚེས་༡༡ ཉིན་བོད་ཀྱི་ གསོ་བ་རིག་པའི་ལྷན་ཚོགས་ནས་གསོ་བ་རིག་པའི་ཉིན་མོ་སྲུང་རྩི་ཞུ་རྒྱུ་ཡིན་པའི་ཉིན་མོ་དེའི་ཐོག་གསོ་རིག་ལྷན་ ཚོགས་ནས་༸སྤྱི་ནོར་༸གོང་ས་སྐྱབས་མགོན་༸སྐུ་འཕྲེང་བཅུ་བཞི་པ་ཆེན་པོ་མཆོག་ལ་བོད་ཀྱི་གསོ་བ་རིག་པའི་ བསྟན་པའི་མེ་རོ་རྨང་ནས་གསོས་གནང་མཛད་ཅིང་བོད་ཀྱི་གསོ་བ་རིག་པའི་བསྟན་པ་འདི་ཉིད་མི་ཉམས་དར་སྤེལ་ལ་བཀའ་དྲིན་འཇལ་ཐབས་བྲལ་བའི་སྐུ་དྲིན་རྗེས་དྲན་ཞུ་བ་དང་། དམིགས་བཀར་མགོན་པོ་གང་ཉིད་འདི་ལོ་དགུང་ ཀེག་དངོས་གཞིའི་ཚུལ་བསྟན་སྐུ་གེགས་ཀྱི་མཚན་མ་ཅི་མཆིས་རྨེག་མེད་དུ་ཞི་ནས་སྐུ་ཚེ་༸རྒྱལ་བ་ཚེ་མཐའ་ཡས་པའི་ངོ་བོར་བརྟན་པ་དང་ཐུགས་ཀྱི་བཞེད་དགོངས་མཐའ་དག་གེགས་མེད་ལྷུན་གྱིས་འགྲུབ་པའི་ཆེད་དུ་རང་རེ་བོད་ཀྱི་གསོ་བ་རིག་པའི་འཚོ་བྱེད་སྨན་པ་རྣམས་ནས་སངས་རྒྱས་སྨན་བླའི་གཟུངས་སྔགས་གྲངས་གསོག་དང་དེ་བཞིན་ཁྱབ་ཁོངས་སྨན་པ་རྣམས་ཀྱི་ཚབ་ཞུས་ཏེ་ལྷན་ཚོགས་ནས་དཔལ་ལྡན་དགའ་ལྡན་ཕོ་བྲང་བརྒྱུད་ནས་༸གོང་ས་ ༸སྐྱབས་མགོན་ཆེན་པོ་མཆོག་ལ་སངས་རྒྱས་སྨན་བླའི་སྐུ་བརྙན་འབུལ་བའི་སྒོ་ནས་བརྟན་བཞུགས་བསྟར་འབུལ་ གྱི་མནྜལ་རྟེན་དོད་བཅས་འབུལ་གཏན་འཁེལ་ཡོད་ན་འབྲེལ་ཡོད་སྨན་པ་རྣམས་ནས་སངས་རྒྱས་སྨན་བླའི་ གཟུངས་སྔགས་གྲངས་གསོག་གིས་གྲངས་ཐོ་དང་སྨན་པ་ངོ་རེ་ནས་སེར་སྣ་དང་གཏམ་དོན་སོགས་ཀྱི་དྲི་མས་མ་ གོས་པར་བསམ་པ་རྣམ་དག་གིས་བློས་བཅད་ཞལ་འདེབས་བཅས་ལྷན་ཚོགས་ཀྱི་ལས་ཁུངས་སམ་ཡང་ན་ཁྱབ་ ཁོངས་ས་གནས་འབྲེལ་མཐུད་པ་བརྒྱུད་ནས་ཕྱི་ལོ་༢༠༡༩ ཟླ་༨ ཚེས་༡༥ འགྱངས་མེད་བསྐུར་གནང་ཡོང་བའི་ ཡོངས་ཁྱབ་གསལ་བསྒྲགས་སུ། བོད་ཀྱི་གསོ་བ་རིག་པའི་ལྷན་ཚོགས་ཀྱི་ཡིག་ཚང་ནས་ཕྱི་ལོ་༢༠༡༩ ཟླ་༤ ཚེས་༣༠ ལ་ཕུལ།།
ཆོགས་དངུལ་བསྡུ་འབུལ་གསལ་བསྒྲགས།
༄༅། །བོད་ཀྱི་གསོ་བ་རིག་པའི་ལྷན་ཚོགས་འོག་དེབ་སྐྱེལ་ཡོད་པའི་ཚོགས་མི་སྨན་པ་ཡོངས་ལ། ཆེད་ཞུ། བོད་ཀྱི་གསོ་བ་རིག་པའི་ལྷན་ཚོགས་ནས་སྔ་ཕྱིར་རེ་སྐུལ་ཞུས་དོན་ལྷན་ཚོགས་ནས་གཏན་འབེབས་གནང་བའི་ བོད་ཀྱི་གསོ་བ་རིག་པའི་སྨན་པ་རྣམས་ཀྱི་དེབ་སྐྱེལ་ཞུ་སྤྲོད་བྱེད་ཕྱོགས་ཀྱི་སྒྲིག་གཞི་དོན་ཚན་༡༠།ཀ དགོངས་ དོན་ཕྱི་ལོ་༢༠༠༨ ནས་དེབ་སྐྱེལ་ཚོགས་མི་རྣམས་ནས་ཚོགས་དངུལ་མི་ཉུང་བ་རེ་བསྡུ་འབུལ་ཞུ་རྒྱུའི་གྲོས་ཆོད་ བྱུང་ཡོད་ན་འདས་པའི་ལོ་བཅུའི་རིང་ཚོགས་མི་མང་དག་གིས་ཚོགས་དངུལ་དུས་ཐོག་ཕུལ་ཡོད་ན་ཚོགས་མི་ འགའ་རེས་ད་བར་ཚོགས་དངུལ་འབུལ་མེད་པ་དང་འགའ་རེས་ཚོགས་དངུལ་ལོ་ཤས་ཆད་འདུག་ན་ལྷན་ཚོགས་ ནས་གསོ་རིག་གསར་འཕྲིན་དང་དྲ་རྒྱའི་ཐོག་གསལ་བསྒྲགས་སྤེལ་ཡོད་པ་དང་ལྷག་པར་སྔ་ལོ་༢༠༡༧་་༡༨ ལོའི་ ལྷན་ཚོགས་ཀྱི་ལོ་འཁོར་རྩིས་ཞིབ་གནང་བའི་རྩིས་ཞིབ་སྙན་ཐོའི་ནང་དེབ་སྐྱེལ་ཚོགས་མི་རྣམས་ནས་ཚོགས་ དངུལ་ཆད་ལྷག་གི་གནས་སྟངས་གསལ་སྟོན་གནང་ཡོད་ན་ལྷན་ཚོགས་ནས་ད་ལན་སླར་ཡང་དེབ་སྐྱེལ་སྨན་པ་ གང་ཞིག་ཚོགས་དངུལ་འབུལ་མེད་པ་རྣམས་གང་མགྱོགས་ཚོགས་དངུལ་འབུལ་གནང་ཡོང་བའི་རེ་སྐུལ་ཞུ། སྤྱིར་ལོ་འཁོར་རྩིས་ཁྲ་དེ་ཟླ་༣ པའི་ཚེས་༣༡ ནང་མཇུག་སྒྲིལ་བཞིན་ཡོད་ནའང་དེབ་སྐྱེལ་ཚོགས་མི་རྣམས་ནས་ གོང་ཚེས་ནང་ཚུད་འབུལ་ཐུབ་ན་གང་ལེགས་དང་དེ་མིན་དུས་ཚོད་འགྱངས་མེད་ཐོག་ཚོགས་དངུལ་འབུལ་གནང་ཡོང་བའི་རེ་སྐུལ་སླར་ཡང་ཞུ། ཚོགས་དངུལ་ཆད་ལྷག་གནས་སྟངས་དེ་ལྷན་ཚོགས་ཀྱི་གཤམ་གསལ་དྲ་རྒྱའི་ཐོག་ གཟིགས་གནང་ཡོང་བ་ཞུ།། http://tibmedcouncil.org/registered-medical-practitioner/ བོད་ཀྱི་གསོ་བ་རིག་པའི་ལྷན་ཚོགས་ཀྱི་ཡིག་ཚང་ནས་ཕྱི་ལོ་༢༠༡༩ ཟླ་༣ ཚེས་༢༧ ལ་ཕུལ།།
གཡུ་ཐོག་སྙིང་ཐིག་གསོ་རིག་སྨན་སྦྱོར་ཁང་གཏན་འཇགས་དེབ་སྐྱེལ་གནང་བ།
བོད་ཀྱི་གསོ་བ་རིག་པའི་ལྷན་ཚོགས་ཀྱི་ཁྲིམས་སྒྲིག་དགོངས་དོན་ཕྱི་ལོ་༢༠༡༤ ལོར་རྡ་ས་ཁུལ་དུ་ཡོད་པའི་གཡུ་ ཐོག་སྙིང་ཐིག་གསོ་རིག་སྨན་སྦྱོར་ཁང་དེ་བཞིིན་བོད་ཀྱི་གསོ་བ་རིག་པའི་སྨན་སྦྱོར་སྡེ་ཚན་ཚད་ལྡན་ཞིག་ཏུ་ལོ་ གསུམ་གྱི་ཕྲལ་སེལ་ངོས་ལེན་དེབ་སྐྱེལ་གནང་ཞིང་དེབ་སྐྱེལ་དུས་བཀག་དེ་བཞིན་ཕྱི་ལོ་༢༠༡༧ ཟླ་༡༢ ཚེས་༡༩ ཉིན་གཙང་བཞིན་ཡོད། བོད་ཀྱི་གསོ་བ་རིག་པའི་སྨན་དང་སྨན་སྦྱོར་ཚད་ལྡན་གྱི་རྩ་འཛིན་སྒྲིག་གཞི་དགོངས་དོན་ཕྱི་ལོ་༢༠༡༧ ཟླ་༡༡ ཚེས་༢༠ ཉིན་ལྷན་ཚོགས་ཀྱི་ཚོགས་མི་༸རྒྱལ་བའི་སྐུ་བཅར་སྨན་རམས་པ་སྤེན་པ་ཚེ་རིང་ལགས་ཀྱི་གཙོ་སྐྱོང་ འོག་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་སྐུ་ཚབ་ཚོགས་མི་སྐུ་ཞབས་བསོད་ནམས་སྟོབས་རྒྱལ་ ལགས་དང་རྡ་ས་ས་གནས་འགོ་འཛིན་སྐུ་ཞབས་ཟླ་བ་རིན་ཆེན་ལགས་བཅས་ཚོགས་མི་གསུམ་ལས་གྲུབ་པའི་ རྟོགས་ཞིབ་ཚོགས་ཆུང་གི་ཚོགས་མི་རྣམས་གོང་གསལ་སྨན་སྦྱོར་ཁང་དུ་རྟོགས་ཞིབ་ཆེད་ཕེབས་གནང་། སྒྲིག་ མཐུན་ཚོགས་ཆུང་གི་ལས་བསྡོམས་སྙན་ཐོ་དང་ཡིག་ཆ་ཁག་བཅས་ལྷན་ཚོགས་སུ་འབྱོར་བར་ལྷན་ཚོགས་ཀྱི་ཕྱི་ ལོ་༢༠༡༧ ཟླ་༡༢ ཚེས་༡༧ ཉིན་ཟླ་རེའི་ཚོགས་འདུའི་ཐོག་གོང་གསལ་སྙན་ཐོ་དང་ཡིག་ཆ་ཁག་བཅས་ལ་ཞིབ་ དཔྱད་གྲོས་བསྡུར་ལེགས་པར་བྱས་མཐར་གཡུ་ཐོག་སྙིང་ཐིག་གསོ་རིག་སྨན་སྦྱོར་ཁང་དེ་བཞིན་ཕྱི་ལོ་༢༠༡༧ ཟླ་༡༢ ཚེས་༡༨ ཉིན་ནས་བོད་ཀྱི་གསོ་བ་རིག་པའི་སྨན་སྦྱོར་སྡེ་ཚན་ཚད་ལྡན་ཞིག་ཏུ་གཏན་འཇགས་ངོས་ ལེན་གྱིས་དེབ་སྐྱེལ་གནང་བ་དང་སྒྲིག་གཞི་དགོངས་དོན་ལོ་གསུམ་རེའི་མཚམས་ཆོག་མཆན་འཕར་འགྱངས་ ཞུ་དགོས་པར་རྟེན་གོང་གསལ་སྨན་སྦྱོར་ཁང་དེ་བཞིན་ཕྱི་ལོ་༢༠༡༧ ཟླ་༡༢ ཚེས་༡༨ ནས་ཕྱི་ལོ་༢༠༢༠ ཟླ་༡༢ ཚེས་༡༧ བར་ལོ་གསུམ་གྱི་ཆོག་མཆན་འཕར་འགྱངས་ཞུས། གཏན་འཇགས་དེབ་སྐྱེལ་ལག་འཁྱེར་དེ་བཞིན་ འདི་ལོའི་ཟླ་༢ པའི་ཚེས་༢༨ ཉིན་རྒྱལ་སྤྱིའ་བོད་ཀྱི་གསོ་བ་རིག་པའི་བགྲོ་གླེང་ཚོགས་ཆེན་ཐེངས་གསུམ་པའི་ ཐོག་ཕུལ་རྒྱུར་གཏན་འཁེལ་ཡང་སྐབས་མཚམས་དོན་རྐྱེན་གྱིས་ཕུལ་མ་ཐུབ་པར་ད་ལན་ལྷན་ཚོགས་ཀྱི་ཟླ་བཞི་ པའི་ཟླ་རེའི་ཚོགས་འདུའི་ཐོག་ལྷན་ཚོགས་གཞོན་སྨན་པ་ཨོ་ཤོད་བསོད་ནམས་སྒྲོལ་དཀར་ལགས་ནས་དེབ་སྐྱེལ་ལག་འཁྱེར་ཕུལ་གནང་ཡོད། གཡུ་ཐོག་སྙིང་ཐིག་གསོ་རིག་སྨན་སྦྱོར་ཁང་འདི་ནི་ཕྱི་ལོ་༢༠༡༠ ཟླ་༡…
འཛམ་གླིང་འཕྲོད་བསྟེན་ཉིན་མོ།
བོད་ཀྱི་གསོ་བ་རིག་པའི་ལྷན་ཚོགས་ཀྱི་གོ་སྒྲིག་འོག་ཕྱི་ལོ་༢༠༡༨ ཟླ་༤ ཚེས་༧ ཉིན་འཛམ་གླིང་འཕྲོད་ བསྟེན་ཉིན་དང་བསྟུན་ལྷན་ཚོགས་ཀྱི་ཚོགས་མི་སྨན་པ་ཚེ་རིང་མཚམས་གཅོད་ཀྱིས་རྡ་ཤོད་བོད་ཁྱིམ་ སློབ་གྲྭའི་སློབ་མ་རྣམས་ལ་གསོ་བ་རིག་པའི་ངོ་སྤྲོད་དང་མདུན་ལམ། དེ་བཞིན་སྤྱི་བཏང་ཟས་སྤྱོད་ འཕྲོད་བསྟེན་སྐོར་གཏམ་བཤད་དང། དེ་བཞིན་སྨན་པ་ཚེ་རིང་དཔལ་མོ་ལགས་ནས་དབུས་གཞུང་ནང་ པའི་མཐོ་སློབ་ཁང་གི་སློབ་མ་དང་བཙུན་མ་རྣམས་ལ་སེམས་ཁམས་འཕྲོད་བསྟེན་སྐོར། དེ་བཞིན་སྨན་པ་ རབ་དགའ་ལགས་ནས་སཱ་ལུ་སྒ་རར་དཔལ་ལྡན་སྲད་རྒྱུད་གྲྭ་ཚང་དུ་ཆུ་ཚོད་གཉིས་ཀྱི་རིང་གསོ་བ་རིག་པ་ངོ་སྤྲོད་དང་ཟས་སྤྱོད་འཕྲོད་བསྟེན་སྐོར་གཏམ་བཤད་གནང་བ་དང། ཡང་ལྷན་ཚོགས་ཀྱི་རྒྱ་གར་ལྷོ་ ཕྱོགས་ཁུལ་གྱི་ས་གནས་འབྲེལ་མཐུད་སྨན་པ་ཉི་མ་རྒྱལ་མཚན་ལགས་ནས་མོན་གྷོ་གཏན་སློབ་ཀྱི་སློབ་ མ་རྣམས་ལ་ཕོ་བ་དང་ཆམས་རིམ་ནད་གཞི་སྔོན་འགོག་ཐོག་གཏམ་བཤད་དང་སྨན་པ་སྐྱིད་འཛོམས་ ལགས་ནས་མོན་གྷོ་གཏན་སློབ་ཀྱི་བུ་མོ་རྣམས་ལ་མོ་ནད་ངོ་སྤྲོད་དང་སྔོན་འགོག་བྱེད་ཚུལ། ཡང་སྨན་པ་ རྟ་ར་ངག་དབང་བློ་གྲོས་ལགས་ནས་སྦེལ་ཀོབ་གཏན་སློབ་ཀྱི་སློབ་ཕྲུག་རྣམས་ལ་རྒྱུན་དུ་ཟས་སྤྱོད་འཕྲོད་པར་བསྟེན་ཚུལ་སྐོར་གཏམ་བཤད་དང་སྨན་པ་སྐྱིད་ལུས་ལགས་ནས་ཅོན་ཏ་ར་སློབ་གྲྭའི་སློབ་མ་རྣམས་ཟས་སྤྱོད་ཚུལ་བཞིན་བསྟེན་པའི་སྒོ་ནས་ནད་གཞི་སྔོན་འགོག་བྱེད་ཚུལ་སྐོར་བཅས་གཏམ་བཤད་དང་ དྲི་བ་དྲི་ལན་གནང། ཇི་ལྟར་ལྷན་ཚོགས་ནས་རེ་འདུན་ཞུས་པ་ལྟར་གོང་གསལ་ས་གནས་སྨན་པ་རྣམས་ ནས་སོ་སོའི་ས་གནས་ཀྱི་སློབ་གྲྭ་དང་གྲྭ་བཙུན་ཁག་ལ་འཕྲོད་བསྟེན་གོ་རྟོགས་ཀྱི་གཏམ་བཤད་གནང་ བར་ལྷན་ཚོགས་ཀྱི་ཚོགས་མི་ཡོངས་ཀྱི་ཚབ་ཞུས་ཏེ་ཐུགས་རྗེ་ཆེ་ཞེ་ཞུ་རྒྱུ་ཡིན།།
ཚོགས་ཆེན་གྱི་གསལ་བསྒྲགས།
རྒྱལ་སྤྱིའི་བོད་ཀྱི་གསོ་བ་རིག་པའི་བགྲོ་གླེང་ཚོགས་ཆེན་ཐེངས་གསུམ་པའི་གལ་ཆེའི་གསལ་བསྒྲགས། མཁྱེན་གསལ་བཞིན་རྒྱལ་སྤྱིའི་བོད་ཀྱི་གསོ་བ་རིག་པའི་བགྲོ་གླེང་ཚོགས་ཆེན་ཐེངས་གསུམ་པ་འདི་བཞིན་ཕྱི་ལོ་༢༠༡༨ ཟླ་༢ ཚེས་༢༥ ནས་ཕྱི་ལོ་༢༠༡༨ ཟླ་༣ ཚེས་༡ བར་རྒྱ་གར་གནས་མཆོག་ཝཱ་ར་ ཎཱ་སི་དབུས་བོད་ཀྱི་གཙུག་ལག་སློབ་གཉེར་ཁང་དུ་འཚོག་གཏན་འཁེལ་བ་བཞིན་ཚོགས་ཆེན་གྱི་ གོ་སྒྲིག་ཚོགས་ཆུང་ནས་གསལ་བསྒྲགས་ཞུ་སྙིང། ཚོགས་ཆེན་འདིར་བོེད་རིགས་དང་རྒྱ་དཀར་ནག དེ་བཞིན་བལ་ཡུལ་དང་འབྲུག སོག་པོ་དང་ཨུ་རུ་སུ། དེ་བཞིན་ནུབ་ཕྱོགས་ནས་མཁས་དབང་ བཅས་ཁྱོན་མཁས་དབང་གྲངས་༢༥ ཙམ་གདན་ཞུ་གནང་ཐོག་རྒྱ་དཀར་ནག་སྟོད་ཕྱོགས་བོད་ ཅེས་སྨན་གྱི་ལུགས་ཆེན་གསུམ་གཞིར་བཞག་གི་བརྗོད་གཞི་འདྲ་མིན་ཐོག་གཏམ་བཤད་བགྲོ་གླེང་གནང་གཏན་འཁེལ། དེ་སྔ་གསལ་བསྒྲགས་སྤེལ་དོན་བཞིན་བོད་ཀྱི་གསོ་བ་རིག་པ་དང་འབྲེལ་ བའི་བརྗོད་གཞིའི་ཐོག་དཔྱད་རྩོམ་གྲངས་༢༠ ཙམ་འབྱོར་ཡོད་ནའང་དེའི་ནང་ནས་དཔྱད་རྩོམ་ གྲངས་༡༢ དྲག་འདེམས་ཀྱིས་སྒྲོག་སྦྱང་གོ་སྐབས་འབུལ་གཏན་འཁེལ་བ་བཞིན་གནང་རྒྱུར་ངེས། ཚོགས་ཆེན་འདིར་ཚོགས་བཞུགས་ཚོགས་བཅར་བ་རྣམས་ལ་བཞུགས་སའི་མགྲོན་ཁང་གླ་རོགས་ དགོས་ཚེ་གོ་སྒྲིག་ཚོགས་ཆུང་གི་གློག་འསཕྲིན་ཁ་བྱང་<2018ictm@gmail.com>འདི་ཐོག་ འབྲེལ་བ་གནང་རོགས་ཞུ། དེ་སྔ་ཡོངས་ཁྱབ་གསལ་བསྒྲགས་སྤེལ་དོན་བཞིན་ཚོགས་ཆེན་འདིར་ ཚོགས་བཞུགས་ཆེད་ཐོ་འགོད་དེབ་སྐྱེལ་ངེས་པར་གནང་དགོས་ཅིང་ཐོ་འགོད་དེབ་སྐྱེལ་སྔ་མ་དེ་ ཕྱི་ལོ་༢༠༡༧ ཟླ་༡༢ ཚེས་༣༠ བར་ཡིན་པ་དང་དེ་རྗེས་དུས་བཀག་བར་མ་དེ་༢༠༡༨ ཟླ་༢ ཚེས་༡༥ དང་དེ་ནས་ཚོགས་ཐོག་དེབ་སྐྱེལ་ཅེས་རིམ་པ་གསུམ་ཙམ་ཡོད་ན་ད་ཆ་ཐོ་འགོད་དེབ་སྐྱེལ་སྔ་མའི་དུས་ཚེས་དེ་ཟིན་ཉེ་བས་ཚོགས་བཅར་དོན་གཉེར་བ་དེབ་སྐྱེལ་གནང་རྒྱུ་ཡིན་པ་རྣམས་ལ་དེ་དོན་དྲན་སྐུལ་དུ་ཞུ། ཚོགས་ཆེན་ཐོག་གསུང་བཤད་གནང་མཁན་མཁས་དབང་དང་ཁོང་རྣམ་པའི་ལོ་རྒྱུས་སྙིང་བསྡུས་བཅས་ཚོགས་བཅར་བ་ཡོངས་ལ་མཁྱེན་རྟོགས་སླད་ད་ལན་དྲ་ཐོག་ཏུ་སྤེལ་བཞིན་ཡོད། ཚོགས་ ཆེན་དང་འབྲེལ་བར་དོགས་འདྲི་ཅི་མཆིས་གློག་འཕྲིན་ཁ་བྱང་འདི་ ཐོག་<2018ictm@gmail.com>གཏོང་གནང་ཡོང་བ་ཞུ། ཚོགས་ཆེན་གྱི་གོ་སྒྲིག་ཚོགས་ ཆུང་ནས་ཕྱི་ལོ་༢༠༡༧…
རྒྱལ་སྤྱིའི་བོད་ཀྱི་གསོ་བ་རིག་པའི་བགྲོ་གླེང་ཚོགས་ཆེན་ཐེངས་གསུམ་པ།
༡། ཚོགས་ཆེན་ངོ་སྤྲོད། མཐོ་ཞིང་བརྗིད་ཆགས་ལ་ཡིད་དུ་འོང་བའི་གངས་རིའི་མུ་འཁྱུད་ཀྱིས་ཕྲེང་བས་ཚར་དུ་དངར་བའི་བསིལ་ལྡན་ཁ་བ་རིག་པའི་ཡུལ་ལྗོངས་ནི་འཛམ་གླིང་གི་ཡང་རྩེར་གནས་ཤིང་མཛེས་སྡུག་མངོན་པར་བཀྲ་བའི་བཀོད་པ་ཕུན་སུམ་ཚོགས་པ་ཙམ་མ་ཟད་རང་བྱུང་ཁམས་ཀྱི་ཁོར་ཡུག་ནང་རིན་ཆེན་གཏེར་སྨན་དང་སྐྱེ་དངོས་རྩི་ཤིང་སོགས་ཀྱིས་རབ་ཏུ་ཕྱུག་ཅིང་ཁྱད་དུ་འཕགས་པའི་སྨན་ལྗོངས་ལྟ་ན་སྡུག་པའི་ཞིང་ཁམས་གཉིས་པ་ལྟ་བུ་ཞིག་ཏུ་གྱུར་ཡོད། དེང་རབས་མནའ་རྫས་ཞིབ་འཇུག་མཁན་གྱིས་དཔྱད་དོན་ལྟར་ན་བོད་དང་བོད་མི་རིགས་ནི་ཉུང་མཐར་ལོ་ངོ་ལྔ་སྟོང་ལྷག་གི་ལོ་རྒྱུས་ལྡན་ཡོད་པའི་བདེན་དཔང་བྱེད་བཞིན་ཡོད་པ་དང་།ཡང་རང་བྱུང་བྲག་ཕུག་གི་ནང་དུ་རྙེད་སོན་བྱུང་བའི་གདོད་མའི་བོད་མིའི་རུས་སྒྲོམ་ལ་དཔྱད་ཞིབ་བྱས་པ་ལྟར་ན་ལོ་ངོ་ཆིག་ཁྲི་ལྷག་གི་ལོ་རྒྱུས་ཀྱི་བྱུང་བ་གསལ་བཤད་བྱེད་བཞིན་ཡོད། གང་ལྟར་ཡང་སྐབས་འདིར་བོད་ཀྱི་གསོ་བ་རིག་པར་མཚོན་ན་མ་མཐར་ཡང་ལོ་ངོ་སུམ་སྟོང་ལྷག་གི་ལོ་རྒྱུས་ལྡན་ཡོད་པ་དང་། ལྷག་པར་དུ་རྣམ་དཔྱོད་ཀྱིས་རྩལ་རབ་ཏུ་ཕྱུག་པའི་ཆོས་རྒྱལ་མེས་དབོན་རྣམ་གསུམ་སྤྱི་དང་སྒོས་སུ་ཆོས་རྒྱལ་ཆེན་པོ་ཚངས་པ་ལྷའི་མེ་ཏོག་དཔལ་གྱིས་གནའ་བོའི་བོད་ཀྱི་ཁྱིམ་མཚེས་རྒྱ་དཀར་ནག་སོགས་ཡུལ་གྲུ་ཁག་ནས་ལེགས་ཆའི་སྙིང་པོ་རྣམས་གཅིག་ཏུ་སྡུད་ཕྱིར་ཕྱོགས་ཀྱི་སྨན་པ་མཁས་པ་དགུ་གདན་དྲངས་ཏེ་རྒྱལ་སྤྱིའི་བོད་ཀྱི་གསོ་བ་རིག་པའི་བགྲོ་གླེང་ཚོགས་ཆེན་ཐེངས་དང་པོ་དེ་པུར་རྒྱལ་བོད་ཀྱི་བཙན་པོའི་རླབས་ཆེན་ཐུགས་དགོངས་ལྟར་དུས་རབས་བརྒྱད་པའི་ནང་དུ་ཚོགས་ཐུབ་པ་བྱུང་ཡོད། སྟོན་པ་གཤེན་རབ་མི་བོ་ཆེའི་སྲས་དཔྱད་བུ་ཁྲི་ཤེས་ཀྱིས་གསོ་དཔྱད་བསྟན་པ་མ་བསྐྱངས་པའི་སྔ་རོལ་ནས་གདོད་མའི་བོད་རིགས་མི་དམངས་ཀྱིས་འཚོ་གནས་ཁྲོད་དུ་རང་བྱུང་ཁམས་ཀྱི་ནད་རིགས་སྣ་ཚོགས་ལ་ཡུན་རིང་འཐབ་རྩོད་བྱས་པའི་མྱོང་གོམས་ཀྱི་ལག་ལེན་རིགས་དང་། གཡུང་དྲུང་བོན་གྱིས་བོད་ལུགས་གསོ་རིག་ཐོག་རྒྱལ་ཆེའི་གནས་བབ་བཟུང་བ་ནས་བརྩིས་པའི་ཆོས་རྒྱལ་ཆེན་པོ་སྲོང་བཙན་སྒམ་པོའི་བར་དང་། དེ་ནས་མར་བརྩིས་པའི་ཆོས་ཆེན་པོ་ཁྲི་སྲོང་ལྡེའུ་བཙན་དང་དུས་མཉམ་པའི་བོད་སྨན་མཁས་པ་གཡུ་ཐོག་རྙིང་མ་ཡོན་ཏན་མགོན་པོའི་དུས་སྐབས་དང་། དེ་ནས་རིམ་བཞིན་གཡུ་ཐོག་གསར་མ་ཡོན་ཏན་མགོན་པོ་དང་། དེ་ལས་ཉེ་བར་བརྒྱུད་པའི་བྱང་པ་རྣམ་རྒྱལ་གྲགས་བཟང་དང་ཟུར་མཁར་མཉམ་ཉིད་རྡོ་རྗེ། ༸གོང་ས་ལྔ་པ་ཆེན་པོའི་སྐབས་མི་དབང་པཎ་ཌི་ཏ་སྡེ་སྲིད་སངས་རྒྱས་རྒྱ་མཚོ་༸གོང་ས་སྐུ་འཕྲེང་བཅུ་གསུམ་པ་ཆེན་པོའི་སྐུ་དུས་སློབ་དཔོན་མཁྱེན་རབ་ནོར་བུ། སྤྱི་ལོ་༡༩༥༩ ལོར་རྒྱ་དམག་གིས་བོད་དྲག་པོས་བཙན་འཛུལ་བྱས་རྐྱེན་ལས་སྤྱི་ལོ་༡༩༦༡ ལོར་འཕགས་ཡུལ་བྱང་ཕྱོགས་བཞུགས་སྒར་རྡ་རམ་ས་ལྰར་༸གོང་ས་སྐྱབས་མགོན་༸རྒྱལ་དབང་ཐམས་ཅད་མཁྱེན་ཅིང་གཟིགས་པ་ཆེན་པོས་སླར་ཡང་བོད་ཀྱི་སྨན་རྩིས་ཁང་གསར་བསྐྲུན་མཛད་དེ་སྐྱབས་བཅོལ་དུ་མི་ལོ་ཧྲིལ་པོ་༥༨ འདས་ཟིན་ པའི་བར་བཅས་གོང་གསལ་དུས་བབ་ཀྱི་དུམ་མཚམས་དང་སྤྱི་ཚོགས་ཀྱི་གནས་སྟངས་མི་འདྲ་བའི་ཆ་རྐྱེན་འོག་རང་བྱུང་ཁམས་ཀྱི་ནད་རིགས་སྣ་ཚོགས་ལ་ཡུན་རིང་འཐབ་རྩོད་བྱས་ཏེ་རིག་པའི་གཞུང་ལུགས་དང་ལག་ལེན་གཉིས་གཏན་ལ་ཕབ་སྟེ་ཟུང་དུ་སྤྲེལ་བ་ནས་བཟུང་སྟེ་བོད་དང་། རི་བོ་ཧི་མ་ལའི་རི་བརྒྱུད། བོད་ཀྱི་ཁྱིམ་མཚེས་ཡུལ་གྲུ་ཁག་ཏུ་དུས་རབས་དང་བསྟུན་ཏེ་འགྲོ་བ་མིའི་སྤྱི་ཚོགས་ཀྱི་དགོས་མཁོར་འཚམས་པའི་མཛད་རྗེས་དང་ཞབས་འདེགས་རླབས་ཆེན་བསྒྲུབས་དང་སྒྲུབ་བཞིན་པ་ཡིན།༸ལྷར་བཅས་སྲིད་ཞིའི་གཙུག་རྒྱན་༸སྤྱི་ནོར་༸གོང་ས་སྐྱབས་མགོན་རྒྱལ་བའི་དབང་པོ་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་གི་བླ་ན་མེད་པའི་ཐུགས་བསྐྱེད་དང་ལྷག་པར་གཞལ་བར་དཀའ་བའི་ཐུགས་རྗེའི་བཀའ་དྲིན་གྱི་གྲིབ་བསིལ་འོག་བཞུགས་སྒར་རྡ་རམ་ས་ལཱར་དབུས་བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་ཡ་གྱལ་དཔལ་ལྡན་བོད་མི་མང་སྤྱི་འཐུས་ལྷན་ཚོགས་ནས་གཏན་ལ་ཕབ་པའི་ཁྲིམས་ཡིག་དགོངས་དོན་བོད་ཀྱི་གསོ་བ་རིག་པའི་ལྷན་ཚོགས་ཀྱིས་སྣེ་འཁྲིད་པའི་ཐོག་ལྕགས་པོ་རི་དྲན་རྟེན་བོད་སྨན་སློབ་གཉེར་ཁང་དང་། ཝཱ་ཎ་བོད་ཀྱི་གཙུག་ལག་ཁང་གི་གསོ་རིག་སྡེ་ཚན་བཅས་མཉམ་འབྲེལ་གྱི་གོ་སྒྲིག་ད་ལན་བོད་ཀྱི་གསོ་བ་རིག་པའི་བགྲོ་གླེང་ཚོགས་ཆེན་ཐེངས་གསུམ་པ་འདི་གོ་སྒྲིག་ཞུ་བཞིན་ཡོད། བོད་ཀྱི་གསོ་བ་རིག་པ་འདི་དེང་འཛམ་གླིང་ནང་དར་ཁྱབ་ཆེ་ཆེར་འགྲོ་བའི་དུས་འདིར་གསོ་བ་རིག་པའི་བྱུང་བ་ལོ་རྒྱུས་ཐོག་བཅོས་མེད་ལྷད་མེད་ཀྱིས་འགྲེལ་བརྗོད་དར་སྤེལ་དང། དེ་བཞིན་གསོ་རིག་གཞུང་གི་བལྟ་གྲུབ་དང་བརྟག་ཐབས་རིག་པ། སྨན་རྫས་དང་སྨན་དཔྱད་སོགས་ཀྱི་ལག་ལེན་རྣམས་གཞུང་བཞིན་ཚད་ལྡན་དར་སྤེལ་ཡོང་རྒྱུ། ལྷག་པར་སྲོལ་རྒྱུན་རིག་པའི་སྨན་ལུགས་འདི་དེང་དུས་དང་མཐུན་པའི་ཉམས་ཞིབ་གནང་རྒྱུར་བཅས་ལ་དམིགས་ནས་ད་ལན་རྒྱལ་སྤྱིའི་ཚོགས་ཆེན་ཐེགས་གསུམ་པ་འདི་བསྐོང་ཚོགས་གནང་རྒྱུ་དང། ཚོགས་ཆེན་འདིའི་ཐོག་ལུགས་ཆེན་གསུམ་གྱི་སྨན་ལུགས་སྨནཔ་ཆེད་མཁས་དང་ཉམས་ཞིབ་པ། དེ་བཞིན་ནང་ཆོས་དང་སྐར་རྩིས་རིག་པའི་མཁས་དབང་། གཞན་ཡང་སྐད་ཡིག་དང་རིག་གཞུང་གཅིག་པའི་རྒྱལ་ཁབ་འབྲུག་དང། བལ་ཡུལ། རུ་སོག་ཁུལ་བཅས་ནས་སྨན་པ་གདན་ཞུ་གནང་འཆར་ཡོད་པ་ཡིན། ཚོགས་ཆེན་གྱི་ངོ་སྤྲོད་ལྡེབ་ཤོག་ཆེད་འདིར་བསྣུན། ༢། ལས་རིམ། ཉིན་དང་པོ། ༢༠༡༨།༢།༢༥ སྣེ་ལེན་དེབ་སྐྱེལ་དང་དབུ་འབྱེད་མཛད་སྒོ། ཉིན་གཉིས་པ། ༢༠༡༨།༢།༢༦ ཚོགས་འདུ་དངོས་གཞི། ཐུན་མོང་ཚོགས་ཐེངས། ༢…
ཐུགས་གསོའི་འཕྲིན་ཡིག
ཕྱི་ལོ་༢༠༡༧ ཟླ་༥ ཚེས་༡༢ རེས་གཟའ་པ་སངས་ཉིན་འདི་ག་ཧི་མཱ་ཅལ་མངའ་སྡེའི་ཨཱ་ཡུ་ཝེ་དའི་བློན་ཆེན་ཤྲི་ཀཱ་རན་སིངྒ་མཆོག་སྙུན་གཞིའི་རྐྱེན་གྱིས་འདས་གྲོངས་སོང་བར་ལྷན་ཚོགས་ཀྱི་ཚོགས་མི་ཡོངས་ནས་ཁོང་གི་ནང་མི་བུ་ཕྲུག་ཚང་མར་ཐུགས་གསོ་དང་འདས་པོའི་ཆེད་གསོལ་སྨོན་ཞུ། ཁོང་ཉིད་ཧི་མཱ་ཅལ་མངའ་སྡེ་དང་ལྷག་པར་ཀུ་ལུའི་མི་མང་ཆེད་མི་ཚེ་ཧྲིལ་པོར་ཞབས་འདེགས་ཧུར་བསྐྱེད་ཞུས་པར་མི་མང་གིས་བརྗེད་ཐབས་མེད་པ་ཞིག་ཏུ་གྱུར་ཡོད། དམ་པ་ཁོང་ཉིད་ཕྱི་མ་བདེ་བ་ཅན་གི་ཞིང་དུ་མྱུར་ནས་མྱུར་དུ་སྐྱེ་བར་འགྱུར་བའི་གསོ་བ་སྨོན་ལམ་ཞུ་རྒྱུ་བཅས་བོད་ཀྱི་གསོ་བ་རིག་པའི་ལྷན་ཚོགས་ནས།།
ལྷན་ཚོགས་ཚོགས་ཐེངས་༢༦ བསྐོང་ཚོགས་གནང་བ།
བོད་ཀྱི་གསོ་བ་རིག་པའི་ལྷན་ཚོགས་ཀྱི་ཚོགས་ཐེངས་༢༦ པ་དེ་བཞིན་རྡ་ས་བོད་ཀྱི་གསོལ་མགྲོན་ཁང་དུ་ཕྱི་ལོ་༢༠༡༦ ཟླ་༡༠ ཚེས་༡༠ ནས་ཚེས་༡༤ བར་བསྐོང་ཚོགས་གནང་ཡོད། ཚོགས་ཐེངས་འདིར་ལྷན་ཚོགས་ཚོགས་མི་ཚང་འཛོམས་ཐོག་གྲོས་གཞི་དོན་ཚན་བཅུའི་ཐོག་བཀའ་བསྡུར་གྲོས་ཆོད་བྱུང་ཡོད། ཚོགས་ཐེངས་ཀྱི་ཉིན་དང་པོ་ལྷན་ཚོགས་ཚོགས་མི་རྣམ་པ་དཔལ་ལྡན་སྲིད་སྐྱོང་མཆོག་ཟུར་དུ་མཇལ་བཅར་ཞུས་ཅིང་དཔལ་ལྡན་བཀའ་ཤག་ནས་བོད་ཀྱི་གསོ་བ་རིག་པའི་ལྷན་ཚོགས་ཀྱི་ལས་དོན་ཐོག་བཀའ་བསྡུར་ལམ་སྟོན་གནང་ཡོད་པ་དང་ཕྱི་ཚེས་༡༣ ཉིན་རྒྱབ་དཔལ་ལྡན་འཕྲོད་བསྟེན་བཀའ་བློན་མཆོག་དང་མཇལ་བཅར་ཞུས་ཅིང་ལྷན་ཚོགས་ཀྱི་ལས་དོན་ལས་འཆར་དང་དཀའ་ངལ་ཁག་ཅིག་སྙན་གསན་ཞུས། ཚོགས་འདུའི་མཇུག་སྡོམ་ཚོགས་ཐེངས་ཐོག་བོད་ཀྱི་གསོ་བ་རིག་པའི་ལྷན་ཚོགས་ཀྱི་སློབ་སྟོན་པ་ད་ལྟའི་བོད་མི་མང་སྤྱི་འཐུས་ཚོགས་གཙོ་གཞོན་པ་ཨཱ་ཅཱ་རྱ་ཡེ་ཤེས་ཕུན་ཚོགས་ལགས་གདན་ཞུས་ཀྱིས་ཚོགས་འདུའི་གྲོས་ཆོད་ཁག་སྙན་གསན་ཞུས་པ་དང་སློབ་སྟོན་པ་མཆོག་ནས་ལྷན་ཚོགས་ཀྱི་མ་འོངས་པའི་ལས་དོན་བྱེད་ཕྱོགས། ཚོགས་འདུ་འཚོག་ཕྱོགས། དེ་བཞིན་བོད་ཀྱི་གསོ་བ་རིག་པ་གཙོས་བོད་ཀྱི་རིག་གནས་ཆེ་བ་དང་ཆུང་བ་རྣམས་མི་ཉམས་དར་སྤེལ་བྱེད་དགོས་སོགས་ཀྱི་བཀའ་སློབ་ལམ་སྟོན་གནང་། དེ་རྗེས་གསར་འགྱུར་བརྒྱུད་ལམ་ནས་ལྷན་ཚོགས་ཀྱི་གལ་ཆེའི་གྲོས་ཆོད་དང་འོང་རྒྱུའི་ཚོགས་ཆེན་དང་ལས་རིམ་ཁག་རྒྱངས་སྲིངས་ཞུས་གནང། ཚོགས་ཐེངས་༢༦ པའི་ཐོག་གལ་ཆེའི་གྲོས་ཆོད་བྱུང་བ་གཤམ་གསལ། ༡། བོད་ཀྱི་གསོ་བ་རིག་པའི་ལྷན་ཚོགས་ཀྱིས་སྣེ་འཁྲིད་པའི་ཐོག་གསོ་རིག་སློབ་གཉེར་ཁང་ཐུན་མོང་ནས་རྒྱལ་སྤྱིའི་བོད་ཀྱི་གསོ་བ་རིག་པའི་བགྲོ་གླེང་ཚོགས་ཆེན་ཐེངས་གསུམ་པ་དེ་བཞིན་ཕྱི་ལོ་༢༠༡༧ ཟླ་༡༡ ཚེས་༡༢།༡༣།༡༤ བར་འཚོག་གཏན་འཁེལ། ༢། མ་འོངས་པར་བོད་ཀྱི་གསོ་བ་རིག་པ་དང་རྒྱ་གར་ཚེ་ཡི་རིག་བྱེད་གཉིས་ཐོག་ཉམས་ཞིབ་བྱ་རྒྱུའི་ཐད་ཆེད་ལས་མི་སྣ་གསོ་སྐྱོང་དགོས་པས་ལྷན་ཚོགས་ནས་རྒྱ་གར་དབུས་གཞུང་ནས་ངོས་ལེན་ཡོད་པའི་རྒྱ་གར་ཚེ་ཡི་རིག་བྱེད་ཀྱི་སློབ་གཉེར་ཁང་ནང་བོད་རིགས་སློབ་མ་གཉིས་ལ་ཞབས་སྟེགས་ཟུར་འཇོག་ཐོབ་པར་བྱ་རྒྱུའི་ལས་འཆར་གཏན་འཁེལ་བྱུང། ༣། རྒྱ་གར་དབུས་ཨཱ་ཡུ་ཤའི་བློན་ཆེན་ལས་ཁུངས་ནས་རོགས་དངུལ་ཞུས་ཐོབ་བཞིན་ལྷན་ཚོགས་ནས་ཕྱི་ལོ་༢༠༡༧ ཟླ་༣ ཚེས་༡༣ ནས་ཚེས་༡༨ བར་ཉིན་དྲུག་རིང་གསོ་རིག་སྨན་པ་རྣམས་ཀྱི་ཤེས་ཡོན་གོང་སྤེལ་གྱི་ཟབ་འཁྲིད་ཞིག་རྡ་རམ་སཱ་ལཱར་འཚོག་གཏན་འཁེལ་ཡོད། ༤། ལྷན་ཚོགས་ཀྱི་ཁྲིམས་སྒྲིག་དགོངས་དོན་ཕྱི་ལོ་༢༠༡༦།༡༧ ལོར་བོད་ཀྱི་སྨན་རྩིས་མཐོ་སློབ་ཁང་དང་བོད་ཀྱི་སྨན་རྩིས་ཁང་གི་སྨན་སྦྱོར་ཁང། དེ་བཞིན་ཝཱ་ཎ་བོད་ཀྱི་གཙུག་ལག་སློབ་གཉེར་ཁང་གི་གསོ་རིག་སྡེ་ཚན། གཡུ་ཐོག་སྙིང་ཐིག་སྨན་སྦྱོར་ཁང་དང་བོད་དང་ཧི་མཱ་ལ་ཡའི་སྔོ་སྦྱོར་བཅས་ལ་རྟོགས་ཞིབ་གནང་གཏན་འཁེལ། ༥། བོད་ཀྱི་གསོ་བ་རིག་པའི་ལྷན་ཚོགས་ཀྱི་ཚོགས་མི་གཅིག་རྒྱ་གར་དབུས་སྨན་གྱི་ལྷན་ཚོགས་ཀྱི་ཚོགས་མིར་གཞུང་འབྲེལ་ཐད་བསྐོས་ཡོང་རྒྱུའི་ཆེད་འབྲེལ་ཡོད་ཁག་ཅིག་ནས་རྒྱབ་གཉེར་ཞུས་ཐོག་ལྷན་ཚོགས་ནས་གང་མགྱོགས་རྒྱ་གར་དབུས་སའི་ལས་ཁུངས་ཀྱི་གནད་ཡོད་མི་སྣར་ངོ་བཅར་ཞུ་ཡིག་འབུལ་རྒྱུར་ཐག་གཅོད་བྱུང། ༦། རྒྱ་གར་ཧི་མཱ་ཅལ་མངའ་ཁོངས་རྡ་རམ་སཱ་ལའི་ཨཱ་ཡུ་ཤའི་རྫོང་གི་སྨན་ཁང་དུ་བོད་ཀྱི་གསོ་བ་རིག་པའི་སྒེ་བསྟེན་སྨན་ཁང་ཞིག་འདི་ལོའི་ཕྱི་ཟླ་༡༡ ནང་སྒོ་འཛུག་གནང་རྒྱུའི་གཏན་འཁེལ་ཡོད། ༧། བོད་ཀྱི་གསོ་བ་རིག་པའི་སྨན་པའི་ཤེས་ཚད་གནས་རིམ་(རབ་འབྱམས་པ།…
དངོས་གཞིའི་འོས་བསྡུའི་གསལ་བསྒྲགས།
བོད་ཀྱི་གསོ་བ་རིག་པའི་ལྷན་ཚོགས་སྐབས་ལྔ་པའི་རྒྱུན་ལས་ཀྱི་དངོས་གཞིའི་འོས་བསྡུའི་གསལ་བསྒྲགས། འོས་བསྡུ་ཚོགས་ཆུང་གི་གསལ་བསྒྲགས་འདིར་བསྣུན་ནས་གཟིགས་ཀློག་གནང་རོགས། ཕྱི་ལོ་༢༠༡༦ཟླ་༥ཚེས་༡༢ཉིན་བོད་ཀྱི་གསོ་བ་རིག་པའི་ལྷན་ཚོགས་ཀྱི་འོས་བསྡུ་ཚོགས་ཆུང་ནས་བོད་ཀྱི་དུས་བབ་དྲྭ་རྒྱ་དང་།གསར་ཤོགལྷན་ཚོགས་ཀྱི་དྲྭ་རྒྱ་དང་ངོ་དེབ།གཞན་ཡང་སྨན་པ་དོ་བདག་རང་ཉིད་ཀྱི་གློག་འཕྲིན་ཁ་བྱང་བརྒྱུད་འོས་བསྡུའི་གསལ་བསྒྲགས་དང་།སྨན་པའི་མཚན་གཞུང་བཅས་ཟུར་བསྲིངས་ལྟར།བོད་ཀྱི་གསོ་བ་རིག་པའི་ལྷན་ཚོགས་ཀྱི་འོས་བསྡུའི་སྒྲིག་གཞི་དོན་ཚན་བཅུ་གཅིག་པའི་ནང་གསེས་༼ཉ༽ནང་འཁོད་བཞིན།ཕྱི་ལོ་༢༠༡༦ཟླ་༦ཚེས་༡༣ཉིན་འོས་བསྡུ་ཚོགས་ཆུང་གི་ཚོགས་མི་གསུམ་ལྷན་འཛོམས་ཐོག་སྔོན་འགྲོའི་འོས་ཤོག་གྲངས་བཤེར་ཞུས་པར།༡༽བོད་ཀྱི་སྨན་རྩིས་ཁང་སྒྲིག་ཁོངས་ཚོགས་མི་བཞི་དང་།༢༽སྒྲིག་ཁོངས་གང་དུ་ཡང་མེད་པའི་བོད་པའི་སྨན་པའི་ཁོངས་ཀྱི་ཚོགས་མི་གཉིས།༣༽བོད་མི་མ་ཡིན་པའི་སྨན་པའི་ཁོངས་ཚོགས་མི་བཞི།༤༽གསོ་རིག་འབུམ་བཞིའི་རྒྱུན་འཛིན་སྨན་པ་གཉིས་བཅས་སྔོན་འགྲོའི་འོས་ཐོབ་བྱུང་པའི་སྨན་པ་རྣམས་ཀྱི་མཚན་གཞུང་གཤམ་དུ་ཟུར་བཀོད་ཞུས་ཡོད། དངོས་གཞིའི་འོས་བསྡུ་སྐབས་ཐུགས་སྣང་དགོས་པ།༡།བོད་ཀྱི་སྨན་རྩིས་ཁང་གི་སྒྲིག་ཁོངས་སྨན་པ་རྣམས་ནས་འོས་མི་གཉིས་དང་།༢།སྒྲིག་ཁོངས་གང་དུ་མེད་པའི་བོད་པའི་སྨན་པ་རྣམས་ནས་འོས་མི་གཅིག༣།བོད་མི་མ་ཡིན་པའི་སྨན་པ་རྣམས་ནས་འོས་མི་གཉིས།༤།གསོ་རིག་འབུམ་བཞིའི་རྒྱུན་འཛིན་སྨན་པ་རྣམས་ནས་འོས་མི་གཅིག་བཅས་ལ་འོས་འཕེན་དགོས་པ་དང་།དངོས་གཞི་འོས་འཕེན་སྐབས་འོས་མིའི་མཚན་དང་།དེབ་སྐྱེལ་ཨང་གྲངས།འོས་འཕེན་པ་རང་ཉིད་ཀྱི་དེབ་སྐྱེལ་ཨང་གྲངས་བཅས་གསལ་བཀོད་ཐོག་དེབ་སྐྱེལ་ཡོད་པའི་སྨན་པ་རྣམས་ནས་དངོས་གཞིའི་འོས་བསྡུ་ཕྱི་ལོ་༢༠༡༦ཟླ་༦ཚེས་༡༧ནས་ཕྱི་ལོ་༢༠༡༦ཟླ་༧ཚེས་༡ནང་ཚུད་འོས་འཕེན་དགོས། འོས་ཤོག་གམ་འོས་གཏོང་ཡུལ་ཁ་བྱང་གཤམ་གསལ། བོད་ཀྱི་གསོ་བ་རིག་པའི་ལྷན་ཚོགས་ཀྱི་འོས་བསྡུ་ཚོགས་ཆུང་གི་གློག་འཕྲིན་ཁ་བྱང་cctmelection2016@gmail.com ཡང་ན་མྱུར་འཕྲིན་ཨང་(Fax: 01892-226462)གང་རུང་བརྒྱུད་ངེས་པར་འོས་འཕེན་གནང་དགོས་གལ་ཆེའི་གསལ་བསྒྲགས་སུ། བོད་ཀྱི་གསོ་བ་རིག་པའི་ལྷན་ཚོགས་ཀྱི་འོས་བསྡུ་ཚོགས་ཆུང་ནས་ཕྱི་ལོ་༢༠༡༦ཟླ་༦ཚེས་༡༥ལ།། ཀ བོད་ཀྱི་སྨན་རྩིས་ཁང་གི་སྒྲིག་ཁོངས་དངོས་གཞི་འོས་མི། ༡། སྐུ་བཅར་སྨན་པ་སྤེན་པ་ཚེ་རིང་། CCTM/QMP/3072/06 ༢། སྨན་པ་ཚུལ་ཁྲིམས་སྐལ་བཟང་། CCTM/QMP/3143/06 ༣། སྨན་པ་བསོད་ནམས་སྒྲོལ་དཀར་ཨོ་ཤོ། CCTM/QMP/3322/08 ༤། སྨན་པ་རྡོ་རྗེ་རབ་བརྟན། CCTM/QMP/3183/06 བོད་ཀྱི་གསོ་བ་རིག་པའི་ལྷན་ཚོགས་ཀྱི་ཁྲིམས་ཡིག་དོན་ཚན་༦།༡།ཁ པའི་དགོངས་དོན་བོད་ཀྱི་སྨན་རྩིས་ཁང་སྒྲིག་ཁོངས་ནས་གོང་གསལ་སྨན་པ་བཞི་དངོས་གཞིར་འོས་འདེམས་བྱུང་ཡོད་པས་ཁྲིམས་སྒྲིག་དགོངས་དོན་གོང་གསལ་འོས་མི་བཞི་ནས་འོས་མི་གཉིས་ལ་འོས་འཕེན་དགོས་པ་ཡིན། ཁ། སྒྲིག་ཁོངས་གང་དུ་ཡང་མེད་པའི་དངོས་གཞི་འོས་མི། ༡། སྨན་པ་ཚེ་རིང་མཚམས་གཅོད། CCTM/QMP/3080/06 ༢། སྨན་པ་རྣམ་རྒྱལ་ཁྱུ་གསར། CCTM/QMP/3069/06 བོད་ཀྱི་གསོ་བ་རིག་པའི་ལྷན་ཚོགས་ཀྱི་ཁྲིམས་ཡིག་དོན་ཚན་༦།༡།ག(༤) པའི་དགོངས་དོན་སྒྲིག་ཁོངས་གང་དུ་མེད་པའི་སྨན་པའི་ཁོངས་ནས་གོང་གསལ་སྨན་པ་གཉིས་དངོས་གཞིར་འོས་འདེམས་བྱུང་ཡོད་པས་ཁྲིམས་སྒྲིག་དགོངས་དོན་གོང་གསལ་འོས་མི་གཉིས་ནས་འོས་མི་གཅིག་ལ་འོས་འཕེན་དགོས་པ་ཡིན། ག བོད་མི་མ་ཡིན་པའི་དངོས་གཞི་འོས་མི། ༡། སྨན་པ་ཐུབ་བསྟན་ཐབས་མཁས། CCTM/RMP/3115/06 ༢། སྨན་པ་དྲི་མེད་དགའ་འབྲུག…
ཡོངས་གསལ།།
༄༅། །རྒྱ་ཆེ་བོད་ཀྱི་གསོ་བ་རིག་པའི་རྒྱུན་འཛིན་འཚོ་བྱེད་སྨན་པ་ཡོངས་ལ། ཆེད་ཞུ། བོད་ཀྱི་གསོ་བ་རིག་པའི་ལྷན་ཚོགས་ཀྱི་ཁྲིམས་སྒྲིག་དགོངས་དོན་ལྷན་ཚོགས་ཚོགས་ཐེངས་༢༥ པ་དེ་བཞིན་ཕྱི་ལོ་༢༠༡༦ ཟླ་༣ ཚེས་༢༨།༢༩།༣༠ ཉིན་གསུམ་རིང་བསྐོང་འཚོགས་གནང་ཡོད་ཅིང་ཚོགས་འདུའི་ཐོག་བཙན་བྱོལ་བོད་མིའི་སྤྱི་ཚོགས་ནང་འཕྲོད་བསྟེན་གོ་རྟོགས་སྔར་ལྷག་ཤུགས་ཆེ་སྤེལ་རྒྱུའི་གྲོས་ཆོད་བྱུང་དོན་བཞིན་ད་ཉིན་ཕྱི་ལོ་༢༠༡༦ ཟླ་༤ ཚེས་༧ ནི་འཛམ་གླིང་འཕྲོད་བསྟེན་ཉིན་མོ་འཁེལ་བཞིན་པའི་དུས་ཚིགས་འདི་སྟབས་བསྟུན་ལྷན་ཚོགས་ནས་བོད་ཀྱི་གསོ་བ་རིག་པའི་སྨན་པ་ཡོངས་ལ་ཉམས་ཐག་ནད་པ་གཙོ་བོར་འགྱུར་བའི་མི་མང་ལ་རྒྱུན་དུ་ཟས་སྤྱོད་འཕྲོད་པར་བསྟེན་ཚུལ་གྱི་སློབ་གསོ་ལམ་སྟོན་གང་ཐུབ་གནང་སྐྱོང་ཡོང་བའི་འབོད་སྐུལ་ཞུ། ཉེ་སྔོན་ཟླ་༣ ཚེས་༢༣ ཉིན་༸སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་ནས་བཙན་བྱོལ་བོད་མིའི་སྤྱི་ཚོགས་ནང་འཕྲོད་བསྟེན་ཐད་འཐུས་ཤོར་འགྲོ་ཡི་ཡོད་པའི་བཀའ་སློབ་ (བོད་ཀྱི་སྨན་རྩིས་ཁང་ནས་ད་ལྟ་བར་དུ་བྱས་རྗེས་གྲུབ་འབྲས་ཡག་ཐག་ཆོད་བྱུང་ཡོད་རེད། ད་དུང་ང་ཚོ་གཞིས་ཆགས་ཁག་ཏུ་ཕྱིན་པའི་སྐབས་སུ་མི་ནད་པ་མང་པོ་ཞིག་འདུག་ག སྔོན་འགོག་བྱེད་རྒྱུར་འཐུས་ཤོར་འགྲོ་ཡོད་པའི་རྟགས་གསལ་པོ་འདུག འཕྲོད་བསྟེན་ལས་ཁུངས་ངོས་ནས་འཐུས་ཤོར་ཞེ་བོ་ཕྱིན་པའི་བཟོ་འདྲ་འདུག སྨན་རྩིས་ཁང་བོད་སྨན་གྱི་སྡེ་ཚན་ཁོངས་ནས་འཐུས་ཤོར་ཕྱིན་པའི་བཟོ་བལྟ་འདུག ང་ཚོ་འདིར་འདྲ་ཆགས་པོ་རེ་བྱས། རྒྱས་རྒྱས་སྤྲོད་སྤྲོད་རེ་བྱས། ངོ་ཐོག་ས་གནས་ས་ཐོག་ལ་ནད་པ། དབུལ་ཕོངས། སྐྱབས་མེད་མགོན་མེད་ལྷག་པ་དེ་ང་ཚོ་རྒྱབ་མདུན་ངོ་ལྐོག་མ་མཚུངས་པ་རེད། མདུན་ལ་འདྲ་ཆག་པོ་རེ་བྱས། རྒྱབ་ལ་འཐུས་ཤོར་ཕྱིན་པ་ཡིན་ན་ང་ཚོ་གཟི་བརྗིད་ཁོག་སྟོང་ཟེར་མཁན་དེ་ཆགས་པ་རེད། ) ཅེས་བཀའ་སློབ་ཕེབས་གསལ་ནད་གཞི་སྔོན་འགོག་ཐད་ བོད་ཀྱི་གསོ་བ་རིག་པའི་སྨན་པ་ཞིག་ཡིན་པའི་ཆ་ནས་ནད་པའི་ཚེ་སྲོག་སྐྱོབ་རྒྱུ་དང་ལྷག་པར་མི་མང་གི་འཕྲོད་བསྟེན་བདེ་རྩར་ཟས་སྤྱོད་སློབ་སྟོན་དང་རྒྱུན་དུ་གཙང་འཕྲོད་སློབ་གསོ་ལམ་སྟོན་གནང་རྒྱུའི་འགན་ཞིག་ཡོད་པས་ད་ཉིན་འཛམ་གླིང་འཕྲོད་བསྟེན་ཉིན་མོ་སྲུང་རྩི་དང་འབྲེལ་གསོ་བ་རིག་པའི་སྨན་པ་ཡོངས་ལ་ནད་མནར་ནད་པ་གཙོས་མི་མང་གི་འཕྲོད་བསྟེན་ཐོག་ད་བར་སློབ་གསོ་ལམ་སྟོན་གནང་བཞིན་ཡོད་ཀྱང་ད་དུང་མི་རིགས་ཀྱི་བདེ་རྩ་དང་མི་མང་གི་ཞབས་འདེགས་ཆེད་རང་འཁྲིད་ལས་འགན་གྱི་ཆ་ཤས་འདིའི་ཐོག་སྔར་ལྷག་འབད་སྤུང་གནང་སྐྱོང་ཡོང་བའི་ཡོངས་ཁྱབ་གསལ་བསྒྲགས་ཞུ་རྒྱུ་བཅས་བོད་ཀྱི་གསོ་བ་རིག་པའི་ལྷན་ཚོགས་ཀྱི་ཡིག་ཚང་ནས་ཕྱི་ལོ་༢༠༡༦ ཟླ་༤ ཚེས་༧ ལ་ཕུལ།། http://tibmedcouncil.org/wp-content/uploads/2016/04/2-yongsel.jpg