ཕྱི་ལོ་༢༠༢༡ ཟླ་༡ ཚེས་༥ ཉིན་བོད་ཀྱི་གསོ་བ་རིག་པའི་ལྷན་ཚོགས་དབུ་བརྙེས་ཏེ་ལོ་༡༧ ཧྲིལ་པོ་འཁོར་བ་དང་དུས་བསྟུན་ བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ནས་ལྷན་ཚོགས་ཀྱི་ཡིག་ཚང་ཆེད་ཁང་པ་ཆེ་བ་ཞིག་མཐུན་འགྱུར་སྦྱོར་སྤྲོད་གནང་བ་དེ་དབུ་འབྱེད་གནང་ཡོད། དབུ་འབྱེད་མཛད་སྒོའི་སྐུ་མགྲོན་གཙོ་བོར་དཔལ་ལྡན་འཕྲོད་བསྟེན་བཀའ་བློན་ཆོས་སྐྱོང་ དབང་ཕྱུག་མཆོག་དང་དམིགས་བསལ་སྐུ་མགྲོན་དཔལ་ལྡན་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཞོན་ཨ་ཅཱརྱ་ཡེ་ཤེས་ཕུན་ཚོགས་མཆོག གཞན་སྐུ་མགྲོན་དུ་དཔལ་ལྡན་འཕྲོད་བསྟེན་དྲུང་ཆེ་དང་དྲུང་འཕར། ལྷན་ཚོགས་ཀྱི་འཛིན་སྐྱོང་ ཚོགས་མི་ཟུར་པ་དང་། བོད་ཀྱི་སྨན་རྩིས་ཁང་གི་འགན་འཛིན་དང་བདེ་ལེགས་སྨན་ཁང་གི་འགན་འཛིན་བཅས་ཆེད་ཕེབས་གནང་ཡོད།
མཛད་སྒོའི་ཐོག་མར་སྔ་དྲོ་ཆུ་ཚོད་༩ པའི་ཐོག་གནས་ཆུང་རྡོ་རྗེ་སྒྲ་དབྱངས་གླིང་གི་དགེ་འདུན་པ་གཉིས་ནས་ ལས་ཁུངས་གསར་པར་རབ་གནས་དང་བཀྲ་ཤིས་བརྩེགས་པའི་ཤིས་བརྗོད་གསོལ་འདོན་གནང་། དེ་རྗེས་ཆུ་ཚོད་༡༠ པའི་ ཐོག་དཔལ་ལྡན་འཕྲོད་བསྟེན་བཀའ་བློན་མཆོག་ནས་ལས་ཁུངས་གསར་པ་དབུ་འབྱེད་གནང་རྗེས་སྐུ་མགྲོན་རྣམ་པས་བཀྲ་ ཤིས་མཇལ་དར་དང་མཎ་ཌལ་རྟེན་དོད་ཕུལ་གནང་། དེ་ནས་མཛད་སྒོ་དངོས་གཞིའི་ཐོག་མར་གཡུ་ཐོག་གསོལ་འདེབས་འདོན་ཞིང་སྐུ་མགྲོན་རྣམ་པར་གསོལ་ཇ་འབྲས་བསིལ་འདེགས་འབུལ་ཞུས། དེ་རྗེས་ལྷན་ཚོགས་ཀྱི་ཚོགས་གཙོ་སྨན་པ་ཚེ་རིང་ མཚམས་གཅོད་ཀྱིས་ཕྱི་ལོ་༢༠༢༠ ལོའི་ལོ་འཁོར་ལས་བསྡོམས་སྙན་སྒྲོན་ཞུས་རྗེས་དམིགས་བསལ་སྐུ་མགྲོན་མཆོག་ནས་ལྷན་ཚོགས་ནས་ཕྱོགས་སྒྲིག་ཞུས་པའི་གསོ་རིག་ཆེད་རྩོམ་ཕྱོགས་བསྡུས།༼འདོན་ཐེངས་གཉིས་པ།༽ དྲ་ཐོག་ནས་དབུ་འབྱེད་གནང་། དེ་རྗེས་དཔལ་ལྡན་ཚོགས་གཞོན་ཨ་ཅཱ་རྱ་ཡེ་ཤེས་ཕུན་ཚོགས་མཆོག་ནས་མཛད་བཅར་བ་ཡོངས་ལ་བོད་མི་མང་སྤྱི་འཐུས་ལྷན་ཚོགས་ཀྱི་ཚབ་ཞུས་ཏེ་འཚམས་འདྲི་དང་སྦྲགས་གསུང་བཤད་གནང་དོན་གཙོ་བོ་བོད་ཀྱི་རིག་གནས་ཆེ་བ་ལྔ་ལས་གསོ་བ་རིག་པའི་གཞུང་ལུགས་ནི་ལོ་བརྒྱ་ཕྲག་མང་པོའི་སྔོན་ནས་དར་བའི་བོད་ཀྱི་རིག་གཞུང་ཞིག་ཡིན་པ་དང་། རིག་གཞུང་འདི་ཉིད་མི་ཉམས་རྒྱུན་འཛིན་སླད་༸སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གིས་ཐོག་མར་བཙན་བྱོལ་དུ་འབྱོར་མ་ཐག་བོད་ཀྱི་སྨན་རྩིས་ཁང་ཆེད་འཛུགས་གནང་ནས་ད་ཆ་ལོ་དྲུག་ཅུ་འཁོར་ལ་ཉེ་བ་རེད། དེ་ནས་རྒྱ་གར་ནང་རིམ་པས་ལྕགས་པོ་རི་དྲན་རྟེན་བོད་སྨན་སློབ་གཉེར་ཁང་དང། ཝཱ་ཎ་བོད་ཀྱི་ཆེས་མཐོའི་གཙུག་ལག་སློབ་གཉེར་ཁང་གི་གསོ་རིག་སྡེ་ཚན། དེ་བཞིན་ཧི་མཱ་ཅལ་སོ་ལན་རྫོང་ཁོངས་ན་ཡོད་པའི་གསོ་རིག་འབུམ་བཞིའི་མཐོ་སློབ་སྨན་རིའི་གླིང་། ལ་དྭགས་ དབུས་གཞུང་ནང་པའི་མཐོ་རིམ་སློབ་གཉེར་ཁང་གི་གསོ་རིག་སྡེ་ཚན། ཉེ་བའི་ཆར་སྒང་ཏོག་ཁུལ་དུ་རྣམ་རྒྱལ་བོད་ཀྱི་ཤེས་ རིག་ཉམས་ཞིབ་ཁང་དུ་གསོ་རིག་སློབ་གཉེར་ཁང་། བཅས་ད་ལྟ་ལས་བསྡོམས་ནང་གསལ་བ་ལྟར་སློབ་གཉེར་ཁང་དེ་དག་ལས་སློབ་ཐོན་སྨན་པ་རྣམས་ནས་སྤྱི་ཚོགས་ནང་གསོ་རིག་སྨན་པ་ཐོན་མཁན་མང་དུ་ཕྱིན་ཡོད། བོད་ཀྱི་གསོ་བ་རིག་པའི་གཞུང་ལུགས་ཡོད་པ་དེ་ཚད་ལྡན་ཐོག་བེད་སྤྱོད་གནང་རྒྱུའི་སླད་དགོངས་ཚུལ་མང་པོ་བྱུང་ནས་རིམ་པས་བོད་ཀྱི་གསོ་བ་རིག་པའི་ལྷན་ཚོགས་ཀྱི་ཁྲིམས་སྒྲིག་ཅིག་བོད་མི་མང་སྤྱི་འཐུས་ལྷན་ཚོགས་ནས་གཏན་འབེབས་གནང་བ་རེད། ཁྲིམས་སྒྲིག་དེ་ཐོག་མར་ཕྱི་ལོ་༢༠༠༣ ལོར་གཏན་ལ་འབེབས་གནང་ནས་ད་ཆ་ལོ་ངོ་༡༨ འགྲོ་ཡི་ཡོད་པ་དང་། གསོ་ བ་རིག་པའི་ལྷན་ཚོགས་ཀྱི་སྒྲིག་འཛུགས་དེ་ཉིད་དབུ་བརྙེས་ནས་ལོ་༡༧ འགྲོ་ཡི་ཡོད་པ་རེད། བར་ལམ་ཕྱི་ལོ་༢༠༡༤ ཙམ་ནས་སྒྲིག་འཛུགས་འདི་དགོས་དང་མི་དགོས། གནས་དང་མི་གནས། དེ་འདྲའི་གནས་བབ་ཅིག་གི་ཐོག་སླེབས་རྗེས་ བོད་མི་མང་སྤྱི་འཐུས་ལྷན་ཚོགས་དང་འཛིན་སྐྱོང་བཀའ་ཤག་དབར་གྲོས་ཚོགས་ནང་གོ་བསྡུར་ལྷུག་པོ་གནང་སྟེ་ཚོགས་ཆུང་རིམ་པ་གཉིས་བཙུགས་གནང་བ་རེད། ཚོགས་ཆུང་གཉིས་པ་དེའི་ནང་སྐབས་དེའི་སྤྱི་འཐུས་ཀརྨ་ཡེ་ཤེས་ལགས་ དང་། སྨན་རམས་པ་རྒན་པ་ཚེ་འདས་པདྨ་རྡོ་རྗེ་ལགས། ང་རང་བཅས་གསུམ་ལ་ཟླ་དྲུག་ནང་ཚུན་ལ་གསོ་བ་ རིག་པའི་ལྷན་ཚོགས་ཀྱི་སྒྲིག་འཛུགས་དགོས་དང་མི་དགོས་པའི་ཐོག་སྙན་ཐོ་སྐབས་བཅོ་ལྔ་པའི་གྲོས་ཚོགས་ཚོགས་དུས་བཅུ་པའི་ནང་བསྣམས་དགོས་རེད་ཅེས་གསུངས་སོང་།དེ་གཞིར་བཟུང་ལས་དོན་ཆ་ཚང་སྡེ་ཚན་ལྔ་ལ་བགོས་ཏེ། སྡེ་ཚན་རེ་ལ་དྲི་བ་མི་འདྲ་བ་བཅུ་རེའམ་བཅོ་ལྔ་རེ་བྱས་ནས་དཔལ་ལྡན་འཕྲོད་བསྟེན་བཀའ་ བློན་མཆོག་དང་།དེ་བཞིན་སྨན་རྩིས་ཁང་གི་འགན་འཛིན་གཙོས་པའི་འབྲེལ་ཡོད་ཚང་མར་བོད་ཀྱི་གསོ་བ་ རིག་པའི་ལྷན་ཚོགས་མུ་མཐུད་ནས་གནས་ཐབས་དགོས་གལ་ཐོག་ཚང་མའི་དགོངས་ཚུལ་བླངས་རྗེས། སྔོན་མའི་སྒྲོམ་གཞི་ལ་བསྒྱུར་བ་ཕྲན་བུ་བཏང་ནས་རྒྱ་གར་གཞུང་གི་ལྷན་ཚོགས་ཀྱི་འགྲོ་སྟངས་ཐོག་གོམ་པ་སྤོ་རྒྱུའི་སྒྲོམ་གཞི་ཞིག་བཟོས་ཏེ་སྙན་ཐོ་ཕུལ་བའི་ཐོག་འཛིན་སྐྱོང་བཀའ་ཤག་ནས་དཔལ་འབྱོར་མཐུན་འགྱུར་ གནང་དགོས་ཀྱི་འདུག་ཅེས་ཞུས་པ་གཞིར་བཟུང་། ཕྱི་ལོ་ ༢༠༡༥ ནས་ད་བར་ལོ་དྲུག་འགྲོ་གི་ཡོད་པ་དང་། ཚོགས་པའི་ཚོགས་གཙོ་མི་འདྲ་བ་གསུམ་བྱུང་ཡོད་རེད། གསོ་བ་རིག་པའི་ལྷན་ཚོགས་ཀྱི་ཁྲིམས་སྒྲིག་ཁག་ བོད་མི་མང་སྤྱི་འཐུས་ལྷན་ཚོགས་ནས་གཏན་ལ་ཕབ་པ་རེད།སྤྱི་འཐུས་ལྷན་ཚོགས་ཀྱིས་ཁྲིམས་སྒྲིག་གཏན་ལ་ཕབ་པ་དེ་དག་བོད་མིའི་སྒྲིག་འཛུགས་ཀྱི་ལྷན་ཁང་བདུན་གྱི་ཁྱབ་ཁོངས་དང་།སྤྱི་སྒེར་ཚང་མས་སྲུང་བརྩི་ཞུ་ དགོས། ད་བར་གསོ་བ་རིག་པའི་ལྷན་ཚོགས་ཀྱི་ཡར་རྒྱས་གོང་འཕེལ་བྱུང་བ་དེ་ཚོགས་པའི་ནང་ཡོད་པའི་ ཚོགས་མི་རྣམ་པས་ཕྱར་གྲུ་མཉམ་འདེགས་བྱས་པའི་འབྲས་བུ་རེད། ཁྲིམས་སྒྲིག་གཏན་འབེབས་གནངདགོས་ པ་དང་། ཚོགས་ཆུང་བཙུགས་དགོས་པའི་དམིགས་ཡུལ་གཞིར་བཟུང་ཕྱག་ལས་གནང་དགོས་པ་གལ་ཆེན་པོ་ རེད། ང་རང་གཞུང་ལུགས་འདིའི་ཐོག་བསླབ་པ་སློབ་གཉེར་གནང་བ་ཞིག་མིན་ཡང་། སློབ་སྟོན་པར་སྡོད་ རོགས་གསུངས་པ་གཞིར་བཟུང་ངས་འདིའི་མིང་གནས་ཞིག་འཁྱེར་ནས་ད་བར་བསྡད་ཡོད་པ་དང་། ལས་དོན་ ཚང་མར་རྒྱུས་མངའ་ཡོད་རེད། དེ་བཞིན་ཚོགས་འདུ་རིམ་པར་སྤྱི་འཐུས་རྒྱུན་ལས་ཀྱི་སྐུ་ཚབ་གདན་ཞུས་ གནངབ་ལྟར་ངོ་བཅར་གནང་ཡོད། ཕྱི་ལོ་༢༠༡༩ ལོར་རྒྱལ་ས་ལྡི་ལིར་ཚོགས་ཆེན་འཚོགས་སྐབས་ང་རང་ སློབ་སྟོན་པའི་མིང་ཐོག་ནས་བཅར་བ་ཡིན། སྐབས་དེར་དཔལ་ལྡན་ཚོགས་གཙོ་མཆོག་ཀྱང་ཆེད་ཕེབས་ གནང་ཡོད་རེད། མཐུན་རྐྱེན་ཡག་པོ་སྦྱར་དགོས་ཀྱི་འདུག་གསུངས་པ་གཞིར་བཟུང་དེ་ལྟར་ཕྱོགས་གང་ས་ ནས་སྦྱར་གྱི་ཡོད་རེད། ཐོག་མར་སྤྱི་འཐུས་ལྷན་ཚོགས་ནས་ཁྲིམས་སྒྲིག་གཏན་འབེབས་ཞུས། དེ་རྗེས་བཀའ་ ཤག་ནས་འགན་འཁུར་ཞུས། རིམ་པས་ཚོགས་ཆེན་དང་པོ་བསྐྱངས་སྐབས་ཚོགས་བཅར་བ་མང་པོ་མཇལ་རྒྱུ་ བྱུང་། རྗེས་སུ་ཚོགས་ཆེན་རིམ་པར་ཚོགས་བཅར་བ་ཉུང་རུ་ཉུང་རུ་འགྲོ་གི་འདུག ཕྱི་ལོ་༢༠༡༩ ལོའི་ཚོགས་ ཆེན་ཐེངས་དྲུག་པའི་ཐོག་ཚོགས་བཅར་བ་ཉུང་ཉུང་མ་གཏོགས་ཕེབས་མ་ཐུབ་པའི་གནས་སྟངས་བྱུང་དུས་གང་འདྲ་ཡིན་ནམ་བསམ་པའི་ཚོར་སྣང་བྱུང་།སྤྱིར་གསོ་རིག་སྨན་པ་དེབ་བསྐྱེལ་ཞུས་པ་ལྔ་བརྒྱ་ལྷག་ཡོད་པ་གཞིར་བཟུང་ཚང་མ་ལོགས་ཚོགས་བཅར་དུ་ཕེབས་མ་ཐུབ་ནའང་ཉེ་འཁོར་ལ་ཡོད་པ་རྣམས་ནས་གལ་ཆེ་དོན་ཆེར་བརྩིས་ནས་ཕེབས་དགོས་ཀྱི་རེད་བསམ་གྱི་འདུག རིམ་པས་ལྷན་ཚོགས་དེ་ཉམས་རྒུད་སོང་ནས་བསྐྱར་དུ་ སྤྱི་འཐུས་ལྷན་ཚོགས་དང་།འཛིན་སྐྱོང་བཀའ་ཤག་ལ་ཞུ་མ་དགོས་པ་ཞིག་གནང་དགོས་པ་གལ་ཆེན་པོ་རེད་ ཅེས་གསུངས།གསོ་བ་རིག་པའི་ལྷན་ཚོགས་ནང་སྤྱི་སྒེར་གཉིས་ཀྱི་སྒྲིག་འཛུགས་ཡོད་རེད། གསོ་བ་རིག་པའི་ གཞུང་ལུགས་རྩ་ཆེན་པོ་དེ་འགྲན་བསྡུར་དང་ཚོང་གི་ངོ་བའི་ཐོག་ནས་མ་ཡིན་པར་སྤྱི་ལ་ཕན་ཐོགས་ཐུབ་ དགོས་པའི་ཐོག་གསོ་བ་རིག་པའི་ལྷན་ཚོགས་ནས་སློབ་གསོ་ལམ་སྟོན་གནང་དགོས་པ་གལ་ཆེན་པོ་རེད། ང་ཚོའི་སྨན་གཞུང་དེར་དང་བ་དང་། དད་པ། གུས་པ། ཡིད་ཆེས་ཐོག་ནས་སྨན་གཏུག་བྱེད་པར་ཡོང་གི་ཡོད་ པ་མ་གཏོགས། ཕྱི་ལུགས་པའི་སྨན་ནང་བཞིན་གནས་སྐབས་ན་ཚ་དྲག་རྒྱུའི་ཆེད་དུ་མིན་པ་རེད། དེ་བཞིན་ བོད་ནང་རྒྱ་ནག་དམར་གཞུང་གིས་བོད་ཀྱི་གསོ་བ་རིག་པ་བེད་སྤྱོད་ལོག་པ་གཏོང་སྐབས། གསོ་རིག་ལ་ སྦྱངས་པ་ཡོད་པ་རྣམས་ནས་རྩོམ་ཡིག་སོགས་བྲིས་ནས་ལན་འདེབས་གནང་དགོས་པ། ལྷག་པར་རྒྱ་གར་གྱི་ དཔོན་རིགས་ཁག་ལ་འབྲེལ་བ་ཡག་པོ་གནང་དགོས་སྐོར་སོགས་ཀྱི་གསུང་བཤད་གནང་།
དེ་རྗེས་སྐུ་མགྲོན་གཙོ་བོ་དཔལ་ལྡན་འཕྲོད་བསྟེན་བཀའ་བློན་མཆོག་གིས་གསོ་རིག་ལྷན་ཚོགས་ཀྱི་ལས་ ཁུངས་ཡག་པོ་བྱུང་འདུག་པར་བསྔགས་བརྗོད་དང་།བོད་མིའི་སྒྲིག་འཛུགས་འཛིན་སྐྱོང་བཀའ་ཤག་ནས་ད་བར་མཐུན་འགྱུར་གང་ཐུབ་གནང་གི་ཡོད་པ་དང་། དེ་བཞིན་འཕྲོད་བསྟེན་ལས་ཁུངས་ནས་བོད་ཀྱི་གསོ་བ་རིག་པ་གལ་ཆེར་བརྩིས་ཀྱི་ཡོད་པ་དང་། འདི་ནས་རྒྱུན་གྲོན་ལ་ཕན་པའི་རོགས་དངུལ་དང་དེ་བཞིན་རྒྱ་གར་ དབུས་སའི་གཞུང་ལ་འབྲེལ་གཏུག་སླད་དམིགས་བསལ་རྒྱུན་གྲོན་སོགས་མཐུན་འགྱུར་སྦྱར་ཡོད་སྐོར་གསུངས། གསོ་རིག་སྨན་པ་དང་རིག་གཞུང་བསྟི་གནས་ཁང་ཚང་མས་གཅིག་གིས་གཅིག་ལ་འགྲན་བསྡུར་ལྟ་བུ་མིན་པ་གཅིག་གིས་གཅིག་ལ་གཅིག་ཕན་གཅིག་གྲོགས་དང་ཚང་མས་ནུས་པ་མཉམ་སྤུངས་ཐོག་ནས་ ཕྱག་ལས་གནང་དགོས་ཤིན་ཏུ་གལ་ཆེ་བའི་བཀའ་སློབ་གནང་བ་དང་། ལྷག་པར་༸སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་བོད་ཀྱི་གསོ་བ་རིག་པ་དང་འབྲེལ་བའི་ཐོག་ བཀའ་སློབ་ལམ་སྟོན་གང་གནང་བའི་ཐོག་ཕྱིར་བལྟས་བྱས་ནས་མགོན་པོ་གང་གིས་དུས་ཀྱི་སྔོན་ལ་བཀའ་ སློབ་ལམ་སྟོན་ཕེབས་པའི་ཐོག་ལ་གཟིགས་ཏེ་ད་ལྟའི་དུས་ཚོད་ལ་ལག་བསྟར་གང་ཐུབ་མིན་ཐོག་དཔྱད་པ་ གནང་དགོས་པ་གལ་ཆེན་པོ་ཡིན་སྐོར་སོགས་གསུངས་གནང་། མཛད་སྒོའི་མཐའ་མར་ལྷན་ཚོགས་ཀྱི་ཚོགས་གཙོས་ཚོགས་བཅར་བ་ཡོངས་ལ་ཐུགས་རྗེ་ཞུའི་གསུང་བཤད་གནང་རྗེས་སྔོ་དྲོའི་མཛད་སྒོ་ལེགས་གྲུབ་བྱུང་། མཛད་སྒོའི་རྗེས་ལྷན་ཚོགས་ནས་དྲ་རྒྱའི་ཐོག་ནས་གཏམ་བཤད་ཚོགས་ཐེངས་བཞི་གོ་སྒྲིག་ཞུས་ཅིང་། གཏམ་བཤད་ཀྱི་བརྗོད་གཞི་གཙོ་གསོ་བ་རིག་པ་གཙོས་རྒྱ་གར་ནང་གི་སྲོལ་རྒྱུན་སྨན་ལུགས་ཚེ་ཡི་རིག་བྱེད་དང་། སི་དྡཧ། ཁ་ཆེའི་སྨན་ལུགས་ཡུ་ནཱ་ནི་ལུགས་ནས་གྲུབ་པ་མིའི་ལུས་ཇི་ལྟར་ཆགས་པའི་རྒྱུ་རྐྱེན་ཐོག་གཏམ་ བཤད་དང་དྲི་བ་བགྲོ་གླེང་གནང་ཡོད་པ་བཅས་ཉིན་ཅིག་གི་ལས་རིམ་ལེགས་གྲུབ་བྱུང་ཡོད་པ་བཅས།།