བོད་ཀྱི་གསོ་བ་རིག་པའི་ལྷན་ཚོགས་ཀྱི་ཁྲིམས་སྒྲིག་དགོངས་དོན་ཕྱི་ལོ་༢༠༢༡ ཟླ་༣ ཚེས་༢༠ ཉིན་ལྷན་ཚོགས་འོག་དེབ་སྐྱེལ་ཡོད་པའི་གསོ་རིག་འབུམ་བཞིའི་མཐོ་སློབ་སྨན་རིའི་གླིང་ནས་དེབ་སྐྱེལ་འཕར་འགྱངས་ཀྱི་ཞུ་སྙན་འབྱོར་དོན། འདི་ནས་རྟོགས་ཞིབ་ཚོགས་མི་བཞི་ལས་གྲུབ་པའི་ཚོགས་ཆུང་ཟུར་འཛུགས་ཀྱིས་ཕྱི་ལོ་༢༠༢༡ ཟླ་༨ ཚེས་༢༣ ཉིན་སློབ་ཁང་དུ་དངོས་སུ་རྟོགས་ཞིབ་ཆེད་ཕེབས་གནང་། རྟོགས་ཞིབ་ཀྱི་རྒྱུད་རིམ་ནང་ཐོག་མར་ལྷན་ཚོགས་ཀྱི་ཚོགས་གཙོས་རྟོགས་ཞིབ་ཚོགས་མི་རྣམས་ལ་འཚམས་འདྲི་དང་སྦྲགས་དེ་གའི་སློབ་ཁང་གི་རྒྱབ་ལྗོངས་ངོ་སྤྲོད་དང་འབྲེལ་རྟོགས་ཞིབ་ཀྱི་དགོས་དམིགས་དང་ཡིག་ཆ་ཁག་བཅས་ངོ་སྤྲོད་གནང་། སློབ་ཁང་གི་འགན་འཛིན་ནས་སློབ་ཁང་གི་ཉིན་རེའི་བྱེད་སྒོ་དང་སློབ་དགེ་དང་སློབ་ཚན་བཅས་ངོ་སྤྲོད་གནང་། དེ་རྗེས་ཚོགས་ཆུང་གི་ཚོགས་མི་རྣམས་སློབ་ཁང་གི་འཛིན་ཁང་དང་། སློབ་འཁྲིད་གནང་སྟངས། སློབ་མའི་སྡོད་ཤག་དང་རང་སྦྱོང་ཁང་། བརྟག་དཔྱད་སྨན་ཁང་དང་སྨན་ སྤྲོད་ཁང་། སྨན་རྫས་དང་སྨན་སྦྱོར་ཁང་། ནད་གསོ་ཁང་དང་དཔེ་མཛོད་ཁང་བཅས་ནང་རྟོགས་ཞིབ་ལེགས་པར་གནང་། ཚོགས་ཆུང་གི་ ཚོགས་མིས་སྨན་སློབ་གཉིས་ཟུར་དུ་འབོད་ནས་སློབ་འཁྲིད་སློབ་ཚན། སློབ་ཡོན་བསྡུ་བཞེས་དང་། དཔེ་དེབ་སོགས་ཀྱི་ཆ་རྐྱེན། གཞན་ཡང་དེང་དུས་ཚན་རིག་སོགས་ཡན་ལག་སློབ་ཚན་ཆེད་མཁས་དབང་གདན་ཞུ་དང་དེའི་ཕན་ཐོགས་སྐོར་སོགས་གནས་ཚུལ་ཆ་ཚང་བརྒྱུད་ལོན་ཞུས། དེ་རྗེས་སློབ་ཁང་གི་སློབ་སྤྱི་དང་འགན་འཛིན་བཅས་ལས་འཛིན་སྐྱོང་དང་འབྲེལ་བའི་ཡིག་ཆ་ཁག་ཅིག་དང་། དེ་བཞིན་སློབ་མའི་མཚན་གཞུང་དང་། སློབ་འཁྲིད་རྩ་འཛིན་དང་བསྐྱར་ཞིབ། དཔེ་དེབ་ཐོ་གཞུང་། སློབ་ཐོན་ཕྱག་འཁྱེར་ངོ་བཤུས་བཅས་བོད་ཀྱི་གསོ་བ་རིག་པའི་ལྷན་ཚོགས་ནས་གཏན་འབེབས་གནང་བའི་བོད་ཀྱི་གསོ་བ་རིག་པའི་སྨན་པ་དཀའ་བཅུ་པའི་སློབ་གཉེར་ཁང་གི་དེབ་སྐྱེལ་བྱེད་ཕྱོགས་ཀྱི་རྩ་འཛིན་སྒྲིག་གཞི་དགོངས་དོན་ཆ་རྐྱེན་དང་ཡིག་ཆ་བཅས་མཁོ་སྒྲུབ་ཞུས་རྗེས་སློབ་ཁང་ནས་འགེངས་ཤོག (Form 1/A) ཚོགས་ཆུང་གི་ཚོགས་མི་རྣམས་ནས་རྟོགས་ཞིབ་སྙན་ཐོའི་འགེངས་ཤོག་ (Form 1/ B, C) དང་མཉམ་སྦྱར་ཡིག་ཆ་ཁག་བཅས་ལེགས་ པར་བསྐངས་མཐར་ཚོགས་ཆུང་ནས་གོང་གསལ་སློབ་ཁང་དེར་སྒྲིག་མཐུན་ཆ་རྐྱེན་ཕལ་ཆེར་ཚང་བར་རྟེན་གཏན་འཇགས་དེབ་སྐྱེལ་གྱི་རྒྱབ་གཉེར་གནང་བའི་སྙན་ཐོ་དང་ཡིག་ཆ་བཅས་ལྷན་ཚོགས་སུ་ཕུལ། ཕྱི་ལོ་༢༠༢༡ ཟླ་༨ ༢༦་་་༢༨ བར་གྱི་ལྷན་ཚོགས་ཚོགས་ཐེངས་ ༣༥ པའི་ཐོག་རྟོགས་ཞིབ་སྙན་ཐོ་དང་མཉམ་སྦྱར་ཡིག་ཆ་ཁག་བཅས་ཆ་ཚང་བར་གཟིགས་ཞིབ་གྲོས་བསྡུར་ལེགས་པར་གནང་རྗེས་གསོ་རིག་འབུམ་བཞིའི་མཐོ་སློབ་སྨན་རིའི་གླིང་དེ་བཞིན་ཕྱི་ལོ་༢༠༢༡ ཟླ་༨ ཚེས་༢༨ ནས་བོད་ཀྱི་གསོ་བ་རིག་པའི་དཀའ་བཅུ་པའི་སློབ་གཉེར་ཁང་ཚད་ལྡན་ཞིག་ཏུ་གཏན་འཇགས་ངོས་འཛིན་གྱིས་དེབ་སྐྱེལ་གནང་རྒྱུའི་ཐག་གཅོད་བྱུང་།
