ཕྱི་ལོ་༢༠༢༡ ཟླ་༥ ཚེས་༤ སྔ་དྲོ་ཆུ་ཚོས་༥།༣༠ ཙམ་ལ་བོད་ཀྱི་གསོ་བ་རིག་པའི་ལྷན་ཚོགས་ཀྱི་ཚོགས་གཞོན་ཟུར་པ་སྨན་རམས་པ་ལྷུན་ཁང་ཉི་མ་ཚེ་རིང་མཆོག་སྐུ་ཚེའི་འཕེན་པ་རྫོགས་པའི་ཡིད་སྐྱོའི་གནས་ཚུལ་ཐོས་པར་བོད་ཀྱི་གསོ་བ་རིག་པའི་ལྷན་ཚོགས་ཀྱི་ཚོགས་མི་དང་ལས་བྱེད་ཡོངས་ཀྱི་ཚབ་ཞུས་ཏེ་མྱ་ངན་རྗེས་དྲན་དང་སྦྲགས་གསོལ་བ་སྨོན་ལམ་ཤུགས་དྲག་ཞུ་བ་དང་ཆབས་ཅིག་ཞིང་གཤེགས་ཁོང་གི་ནང་མི་སྤུན་མཆེད་དང་ཉེ་འབྲེལ་རྣམས་ལ་ཐུགས་གསོ་དང་གདུང་སེམས་མཉམ་སྐྱེ་ཞུ།
སྨན་རམས་པ་ལྷུན་ཁང་ཉི་མ་ཚེ་རིང་མཆོག་ནི་ཕྱི་ལོ་༡༩༦༤ ལོར་བོད་རྒྱལ་རྩེ་ཕྱག་སྟོང་ལྷུན་ཁང་གི་ཁྱིམ་གཞིས་ནང་སྐུ་འཁྲུངས་ ཤིང་༡༩༦༨ ནས་ ༡༩༧༡ བར་བོད་རྒྱལ་རྩེ་སློབ་གྲྭར་ལོ་ལྔ་རིང་སློབ་སྦྱོང་གནང་། ཕྱི་ལོ་༡༩༨༡ ལོར་འབྲུག་བརྒྱུད་རྒྱ་གར་དུ་ བཙན་བྱོལ་དུ་འབྱོར། ཕྱི་ལོ་༡༩༨༡ ནས་༡༩༨༢ བར་རྡ་ས་མཚན་ཉིད་སློབ་གཉེར་ཁང་དུ་ལོ་གཅིག་རིང་ནང་ཆོས་སློབ་གཉེར་ གནང་ཞིང་༡༩༨༢་་་༡༩༨༧ བར་བོད་གཞུང་སྨན་རྩིས་མཐོོ་སློབ་ཁང་དུ་ལོ་ལྔའི་རིང་གསོ་བ་རིག་པའི་གཞུང་ལུགས་ལ་སློབ་སྦྱོང་གནང་སྟེ་སྨན་པ་དཀའ་བཅུ་པ་སློབ་མཐར་སོན། ཕྱི་ལོ་༡༩༨༤ དང་ཕྱི་ལོ་༡༩༩༤ ནང་ཏེ་ཛུ་། ཌལ་ཧོར་ས་གནས་འཕྲོད་བསྟེན་ཚོགས་ཆུང་གི་ཚོགས་མི་དང་ས་གནས་གཞོན་ནུའི་ལས་འཁུར་ཞུས། ཕྱི་ལོ་༡༩༨༨ ནས་ཕྱི་ལོ་༢༠༠༣ བར་བོད་ཀྱི་སྨན་རྩིས་ཁང་གི་བརྟག་དཔྱད་སྨན་པའི་འགན་འཁུར་གྱིས་ལོ་ལྔའི་རིང་ཡན་ལག་སྨན་ཁང་ཁག་ནང་སྨན་པའི་ཞབས་ཞུ་བསྒྲུབ་པ་དང་། ཕྱི་ལོ་ ༡༩༩༦ ནས་༢༠༠༣ བར་བོད་ཀྱི་སྨན་རྩིས་ཁང་གི་ལྡི་ལི་བསམ་ཡས་གླིང་ཡན་ལག་སྨན་ཁང་གི་འགན་འཛིན་སྨན་པའི་ཕྱག་ལས་གནང་། ཕྱི་ལོ་༢༠༠༠ ལོར་བོད་ཀྱི་སྨན་རྩིས་ཁང་ནས་སྨན་རམས་པའི་མཚན་གནས་བཞེས། ཕྱི་ལོ་༢༠༠༤ ལོར་ལྡི་ལི་བསམ་ཡས་གླིང་དུ་ལྷུན་ཁང་བོད་ཀྱི་གསོ་རིག་སྨན་ཁང་ཆེད་འཛུགས་ཀྱིས་ད་བར་འགྲོ་བ་ནད་པ་མང་པོར་སྨན་བཅོས་དང་ཉམས་ཐག་ནད་པ་མང་པོར་སྨན་སྦྱིན་གནང་ནས་འགྲོ་བ་ནད་པ་མང་པོའི་ཚེ་སྲོག་སྐྱོབ་པའི་བརླབས་ཆེན་གྱི་མཛད་རྗེས་བཞག་གནང་ཡོད།
ཕྱི་ལོ་༢༠༠༧ ནས་ལོ་གསུམ་རིང་བོད་ཀྱི་གསོ་བ་རིག་པའི་ལྷན་ཚོགས་ཀྱི་ཚོགས་གཙོ་གཞོན་པའི་མཚན་གནས་ཐོག་ཕྱག་ལས་ འགན་འཁུར་གནང་ཡོད་པ་དང་ཕྱི་ལོ་༢༠༡༤ ནས་ད་བར་གསོ་རིག་ལྷན་ཚོགས་ཀྱི་ལྡི་ལི་ཁུལ་གྱི་ས་གནས་འབྲེལ་མཐུད་སྨན་ པའི་ཐུགས་འགན་བཞེས། ཕྱི་ལོ་༡༩༨༨ ནས་བཟུང་ད་བར་ཁྱོན་མི་ལོ་༢༢ ལྷག་གསོ་བའི་བརྟག་དཔྱད་སྨན་པ་དང་དེ་བཞིན་གསོ་རིག་ངོ་སྤྲོད་ཟབ་སྦྱོང་དང་། རྒྱལ་ཕྱི་རྒྱལ་ནང་གི་ཚོགས་ཆེན་ཐོག་གཏམ་བཤད་དང་རྒྱ་གར་གཙོས་ཕྱི་རྒྱལ་ཡུལ་གྲུ་མང་པོར་གཏམ་བཤད་དང་སྨན་སྐོར་རྒྱ་ཆེ་གནང་ནས་གསོ་རིག་བསྟན་དོན་སླད་ཞབས་འདེགས་བླ་ལྷག་ཞུས་གནང་མཛད་པའི་ལོ་རྒྱུས་སྙིང་བསྡུས་སུ།།