བོད་ཀྱི་གསོ་བ་རིག་པའི་ལྷན་ཚོགས་ཀྱི་ཁྲིམས་སྒྲིག་དགོངས་དོན་ཕྱི་ལོ་༢༠༡༦ ཟླ་༢ ཚེས་༡༦ ཉིན་གསོ་རིག་འབུམ་བཞིའི་མཐོ་སློབ་སྨན་རིའི་གླིང་ནས་དེ་གའི་མཐོ་སློབ་ཁང་དེ་བཞིན་བོད་ཀྱི་གསོ་བ་རིག་པའི་ལྷན་ཚོགས་ཀྱི་ཁྲིམས་སྒྲིག་དགོངས་དོན་དེབ་སྐྱེལ་ཡོང་བའི་ཞུ་སྙན་ཕུན་འབྱོར་བྱུང་དོན་ལྷན་ཚོགས་ནས་རྟོགས་ཞིབ་ཚོགས་མི་གསུམ་ལས་གྲུབ་པའི་ཚོགས་ཆུང་ཟུར་འཛུགས་གནང། ཕྱི་ལོ་༢༠༡༦ ཟླ་༣ ཚེས་༢༦ ཉིན་རྟོགས་ཞིབ་ཚོགས་ཆུང་གི་ཚོགས་མི་རྣམས་གསོ་རིག་འབུམ་བཞིའི་མཐོ་སློབ་སྨན་རིའི་གླིང་དུ་རྟོགས་ཞིབ་ཆེད་ཕེབས་གནང་ཞིང་རྟོགས་ཞིབ་དངོས་སུ་སྒོ་བཙུག་མ་ཞུས་གོང་ལྷན་ཚོགས་ཀྱི་དྲུང་ཆེ་ཆེད་ལས་རྒྱུན་ལས་སྨན་པ་ཚེ་རིང་མཚམས་གཅོད་ནས་མཐོ་སློབ་ཀྱི་འགན་འཛིན་ལས་གཙོ་རྣམ་པར་རྟོགས་ཞིབ་ཀྱི་རྒྱབ་ལྗོངས་དང་ཚོགས་མི་རྣམ་པའི་ངོ་སྤྲོད་ཞུས། དངོས་གཞིའི་རྟོགས་ཞིབ་ཆེད་ཚོགས་མི་རྣམས་མཐོ་སློབ་ཀྱི་ཡིག་ཚང་དང་དེ་ནས་རིམ་པས་སློབ་འཁྲིད་འཛིན་ཁང། སློབ་མ་རྣམས་ཀྱི་ཆེད་དུ་ཚོགས་ཁང་དང་སྒོམ་སྒྲུབ་ཁང། དཔེ་མཛོད་ཁང་དང་ནད་པ་བརྟག་དཔྱད་ཁང། སྨན་སྦྱོར་ཁང་དང་ནད་གསོ་ཁང། གཞན་ཡང་སློབ་མའི་སྡོད་ཞག་དང་རང་སྦྱོང་ཁང། དགེ་རྒན་གྱི་ལས་ཤག་དང་ཉེ་འཁོར་ཁོར་ཡུག་གཙང་འཕྲོད་བཅས་ལ་རྟོགས་ཞིབ་གནང། ལྷག་པར་མཐོ་སློབ་དེ་ནས་སློབ་འཁྲིད་གནང་བཞིན་པའི་གསོ་རིག་འབུམ་བཞིའི་སློབ་ཚན་རྣམས་ལྷན་ཚོགས་ནས་གཏན་འབེབ་གནང་བའི་རྩ་འཛིན་གཞིར་བཟུང་སློབ་འཁྲིད་གནང་བཞིན་ཡོད་མེད་བཅས་ལ་རྟོགས་ཞིབ་དྲི་རྩད་ཞུས་གནང།
གསོ་རིག་འབུམ་བཞིའི་མཐོ་སློབ་སྨན་རིའི་གླིང་འདི་བཞིན་ཕྱི་ལོ་༢༠༡༤ ཟླ་༥ ཚེས་༡༣ ཉིན་དངོས་སུ་སྒོ་འཛུགས་གནང་ཞིང་ད་ལྟའི་འཆར་སློབ་འཁྲིད་སྨན་དགེ་གཉིས་དང་རིག་དགེ་གཅིག སློབ་མ་གྲངས་བུ་བརྒྱད་དང་བོུ་གྲངས་༧ བཅས་སྨན་སློབ་གྲངས་༡༥ སློབ་གཉེར་གནང་བཞིན་ཡོད་འདུག སློབ་ཁང་འདི་བཞིན་གཡུང་དྲུང་བོན་འཛིན་སྐྱོང་ལྷན་ཚོགས་མིང་ཐོག་ཁྲིམས་མཐུན་ཚོགས་པ་དེབ་སྐྱེལ་ཡོད་པ་དང་འཛིན་སྐྱོང་ཆེད་འགན་འཛིན་ལྷན་ཚོགས་ཟུར་དུ་ཡོད་པས་བཏང་འཛིན་གནང་བཞིན་ཡོད་འདུག བོད་ཀྱི་གསོ་བ་རིག་པའི་སློབ་གཉེར་ཁང་གི་དེབ་སྐྱེལ་བྱེད་ཕྱོགས་རྩ་འཛིན་སྒྲིག་གཞི་དགོངས་དོན་ཚོགས་ཆུང་ནས་རྟོགས་ཞིབ་ལས་བསྡོམས་དང་དགོས་འཁོའི་ཡིག་ཆ་ཁག རྟོགས་ཞིབ་ཚོགས་མི་སོ་སོའི་དགོངས་ཚུལ་འགེངས་ཤོག་བཅས་ལྷན་ཚོགས་སུ་ཕུལ་ཟིན་ཞིང་ལྷན་ཚོགས་ཚོགས་ཐེངས་༢༥ པའི་ཐོག་གྲོས་བསྡུར་ཐག་གཅོད་གནང་རྒྱུ་ཡིན།།
